iklan

SOSIEDADE SIVĺL

Parokia Imaculada Conceição prepara ministru estraordináriu 40

Parokia Imaculada Conceição prepara ministru estraordináriu 40

Igreja Katedral Dili. Imajen/Egas Cristovão

DILI, 10 juñu 2024 (TATOLI)–Pároku igreja Imaculada Conceição Katedral Dili, Pe. Paulos Maia, hateten parokia Imaculada Conceição sei prepara ministru estraordináriu hamutuk 40 hodi fahe komuñaun iha misa solene ne’ebé Papa Francisco prezide iha Tasi-Tolu, ho durasaun tempu minutu 90 nia laran.

Notísia Relevante: Papa Francisco prezide misa solene iha Tasi-Tolu, igreja prepara ministru estraordináriu 4.000

Nia hateten, haree ba partisipasaun sarani iha disoseze hotu-hotu hamutuk rihun 600 ka 700 iha misa ne’e, konserteza ema fahe komuñaun ne’e tenke barak atu prienxe oras misa nian iha oras ida ho balun ne’e.

“Entaun igreja Timor nian liuhosi Konferénsia Episkopál Timorense foti medida ema leigus di’ak sira hodi sai ministru estraordináriu, aleinde relijiozu no relijioza sira, atu fasilita no tulun fahe komuñaun iha tempu misa ne’e, Itá bele utiliza tempu ne’e di’ak hodi kompleta no kumpre oras ida ho balun ba misa ida-ne’e,” Pároku igreja Imaculada Conceição Katedral Dili, Paulos Maia, hateten ba Tatoli, iha Katedrál.

Tanba sarani barak mak partisipa misa solene ne’e, nia hateten, kada parokia sei prepara ministru extraordinariu ema 40 konpostu husi feto no mane. maibé ho kriteriu ida-ne’ebé Konferénsia Episkopal Timorense fó mak hanesan ema tenke sarani di’ak, karik kaben-na’in ka joven di’ak.

Pároku ne’e hateten, nia parte hetan ona rekezitu sira-ne’e no identifika ona ema sira-ne’ebé atu sai ministru estraordináriu no hein atu fó informasaun.

Tuir nia, parokia ida-idak sei haruka naran sira-ne’e ba iha Konferénsia Episkopál Timorense no sira sei tuir formasaun, antes sai ministru estraordináriu.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!