OPINIAUN

Risku Korrupsaun iha Setór Infraestrutura Timor-Leste

Risku Korrupsaun iha Setór Infraestrutura Timor-Leste

Eskritor: Higino Guterres

 

  1. Introdusaun

Tuir Planu Estratéjiku Dezenvolvimentu Nasionál (PEDN) 2011-2030, Estadu Timor-Leste tau prioridade boot ida iha dezenvolvimentu infraestrutura durante tinan-10 nia laran (2011-2020). Tarjet (alvu) husi planu tinan-10 ne’e, entre ida mak, Estadu hakarak Timor-Leste tenke alkansa ona dezenvolvimentu infraestrutura sira hotu iha territóriu Timor laran tomak. Objetivu husi dezenvolvimentu setór infraestrutura ne’e ho intensaun katak, atu kontribui dudu dezenvolvimentu ekonomia nasionál, tuir vizaun Estadu nian ne’ebé dehan, to’o tinan 2030 mai, ekonomikamente Timor-Leste sei sai nasaun ne’ebé ho nia rendimentu médiu altu, (PEDN, 2011-2030).

Maibé liu ona tinan-10 implementasaun PEDN, Estadu aloka ona orsamentu kuaze biliaun $5,4, no ezekuta ona 61%, ho valór hamutuk biliaun $3,3 (Tatoli 2023) husi Fundu Soberania Petrolífera (FSP) no imprestimu sira husi Banku Mundiál, ADB JAICA no seluktan, realidade dezenvolvimentu infraestrutura sei dook tebes husi espektativa no trajetu ne’ebé iha. Nune’e mós mehi ekonomia PEDN ne’ebé ukun-na’in sira hatuur iha PEDN ne’e, kuaze atu besik ona ba tinan -2030 sei hela de’it ho mehi loromean nian.

Faktu hatudu, dezenvolvimentu iha setór infraestrutura ohin loron, nafatin la’o ho ain kude’ik hela no hasoru estagnasaun boot. Estrada barak halo seidauk to’o tinan naruk aat fali ona. Estrada balun ku’ak taka ku’ak, até barak mak seidauk halo no hadi’a. Ponte no drainajen sira barak mak seidauk halo no barak sei uza hela obra Portugés no Indonézia nian. Kanalizasaun bee-moos de’it la iha progresu di’ak, iha sidade ema barak sei uza bee Sanyo, no jestaun ba kanu bee kanalizasaun sira la efetivu, halo seidauk dura to’o tinan naruk aat fali ona. Edifísiu eskola no ospitál públiku sira la iha kualidade, tanba aat lalais de’it. Irigasaun ba to’os no natar sira mós la halo, to’o projetu sira tasi mane no ZEEMS mós barak hakdasak, la utíl no la benefísiu di’ak ba povu.

Hirak ne’e atu dehan katak, Estadu aloka osan boot ba dezenvolvimentu infraestrutura durante ne’e, barak monu no suli de’it ba “gravatadu” sira-nia liman no bolsu. Hanesan haktuir iha dadus survey persepsaun públika CAC nian 2023 relata katak, krime korrupsaun barak liu mak akontese iha setór infraestrutura nian.

 

  1. Jestaun orsamentu infraestrutura

Timor-Leste iha orsamentu infraestrutura kategoria tolu importante. Orsamentu infraestrutura ida mak aloka ba Projetu Dezenvolvimentu Infraestrutura Munisípiu (PDIM). Orsamentu ida mak aloka iha kada liña ministeriál. Enkuantu, orsamentu infraestrutura ida mak aloka no jere integradu husi órgaun ida naran Conselho Administração Fundo Infraestrutura (CAFI) ne’ebé jere orsamentu infraestrutura nian ho montante $1.000.000.00 millaun ba leten.

CAFI nu’udar orgaun ezekutiva ida-ne’ebé involve instituisaun hotu-hotu, maibé iha instituisaun Estadu balun de’it mak administra fundu sira iha infraestrutura nian. Instituisaun estratéjiku sira ne’ebé involve direta iha órgaun másimu konsellu ida-ne’e mak hanesan; Ministerio Finança (MF), Ministerio Obras Pública (MOP), Ministério Planeamento, Investimento Estratégico (MPIE) no Ministerio Transporte e Comunicação (MTC).

Liña ministériu sira ne’ebé involve direta iha konsellu ida-ne’e, hala’o sira-nia knaar ida mais estratejiku iha ezekusaun fundu infraestrutura nian, tuir mandatu ne’ebé haraik ba ministériu sira. MPIE mak nu’udar prezidente konsellu hodi prezide atividade sira CAFI nian liu-husi servisu tékniku administrativu ne’ebé responsavel husi Sekretaria Grande Projetu (SGP). MOP, MTC ho liña ministériu relevante sira nu’udar dono ka na’in ba projetu infraestrutura públiku sira. Sira-nia papél mak dezeña planu, implementa projetu no halo supervizaun iha terrenu. MF nia funsaun mak atu aloka fundu sira infraestrutura nian, halo prosesu aprovizionamentu liu-husi Conselho Nacionál Aprovisionamento (CNA) no halo pagamentu. Enkuantu, MPIE liuhusi SGP nia funsaun mak apoiu konfirma orsamentu no aprova despeza, halo pagamentu ba orsamentu fundu infraestrutura (FI), no ADN nia papél mak atu halo kontrolu kualidade projetu no sertifika kualidade implementasaun projetu sira (Hahú husi verifikasaun dokumentu projetu no halo inspeksaun progresu fíziku sira iha terrenu hodi rekomenda ba pagamentu ho orsamentu liu 50.000 mill).

 

  1. Risku sira korrupsaun iha implementasaun orsamentu infraestrutura

Seidauk iha estudu no peskiza espesífiku ida mak relata kona-ba risku sira korrupsaun iha setór infraestrutura Timor-Leste nian. Maibé tuir ha’u-nia esperiénsia no observasaun iha setór infraestrutura no anti-korrupsaun nian, ha’u halo analiza balun no nota katak, risku korrupsaun iha setór infraestrutura Timor-Leste nian perigu tebes no iha potensialidade boot lori prejuízu boot ba Estadu no povu Timor-Leste. Risku sira ne’ebé hahoris korrupsaun iha projetu infraestrutura sira mak tuir-mai ne’e:

  1. a) Risku korrupsaun iha prosesu planeamentu

Estadu Timor-Leste sei hasoru lakuna boot ida kona-ba planu dezeña projetu setór infraestrutura sira. Polítika dezeña dezenvolvimentu infraestrutura tinan hirak ne’e la klaru no dezorganizadu liu. Ida-ne’e akontese tanba kada governasaun sira-nia ukun, dezeña setór infraestrutura tuir ida idak nia interese de’it. Atu dehan katak, guvernu A nia ukun dezeña polítika dezenvolvimentu infraestrutura ida, governasaun B nia ukun fali dezeña polítika seluk ida. Ho inkosisténsia no planu ne’ebé la klaru ba dezenvolvimentu setór infraestrutura, ida-ne’e mak halo Estadu gastu osan saugate ba projetu barak ne’ebé halo husik hela de’it (balun halo la hotu, no balun halo dada naruk tempu projetu), ikusmai fó ksolok de’it ba kompaña sira manan lukru boot husi projetu sira ne’e. Dadus husi Agência Dezenvolvimentu Nacional ne’ebé haktuir husi notísia Timor Post relata katak, ADN identifika, kuaze projetu liu atus ida (100 e tal) mak abandonadu purvolta osan millaun 82.

Ho polítika ne’ebé la klaru ne’e, hamosu mós risku korrupsaun boot ba ukun-na’in sira hodi dezeña setór infraestrutura ne’ebé fó lukru boot ba kompaña sira akumula osan Estadu intensionalmente liuhusi projetu sira ne’ebé la iha benefísiu ba povu. Katak, dezeña projetu ida ho osan ne’ebé boot fó ba malu, maibé ikusmai la iha nia utilidade ba públiku. Ezemplu harii merkadu barak ne’ebé abandonadu, inklui uma MDG sira, projetu kosta sul no ZEEMS, inklui projetu ‘mate klamar’ sira balun.

Dadus ne’ebé fó sai iha notísia online Tatoli (2023) haktuir katak, entre 2011 no 2021, KAFI realiza prosedimentu ajuste diretu hamutuk projetu 287 ho kustu millaun $483,5, ne’ebé projetu 143 adjudika iha 17 julu 2017. Husi projetu 143 sira ne’e, projetu 44 to’o ohin loron nunka formaliza kontratu.

  1. b) Risku korrupsaun iha prosesu aprovizionamentu

Aprovizionamentu nu’udar lahan basah. Ema ne’ebé tuur ka hala’o knaar iha fatin aprovizionamentu, dalabarak balun (la’ós ema hotu) hetan lukru boot no sai riku matak, tanba fasil monu ba prátika sira krime korrupsaun durante halo avaliasaun ba kompaña sira ne’ebé partisipa iha kualifikasaun projetu.

Tuir ha’u-nia hanoin, iha dalan ka asaun tolu mak ajénte públiku sira baibain prátika krime korrupsaun durante prosesu aprovizionamentu. Aktus korrupsaun ida mak konflitu de interrese. Konflitu interrese katak, ajente públiku ida fó projetu ba kompaña ida manan, tanba kompaña ne’e iha relasaun espesiál ruma ho ajente ne’e, duke tau interrese lei no prosedimentu sira ne’ebé legál no justu. Ezemplu fó projetu konstrusaun ruma ba família, kolega ka kór partidu ida. Tuir konsultasaun públiku ida-ne’ebé CAC halo iha tinan 2022 kona-ba risku korrupsaun iha instituisaun Estadu sira relata katak, konflitu interese inklui koluzaun no nepotizmu aas liu iha instituisaun Estadu sira, kompara ho risku korrupsaun sira seluk, (CAC, 2022).

Aktus korrupsaun seluk ne’ebé hamosu korrupsaun boot durante iha prosesu aprovizionamentu ba projetu sira inklui mós partisipasaun ekonomia iha negósiu, abuzu poder no prátika subornu (korrupsaun ativa no pásiva). Partisipasaun ekonomia iha negósiu katak, ajénte públika ida halo intervensaun iha prosesu kontratu ho kompana ruma hodi hetan benefísiu ba nia an no ema indireta ruma, durante iha prosesu aprovizionamentu. Abuzu poder signifika, ajente públiku ida, uza ninia poder ne’ebé iha, deside fo projetu ba kompania ida la tuir kompeténsia ne’ebé atribui ba nia. Subornu katak, ajente públiku ida simu prezente ka osan husi kompaña ida hodi fó projetu ba kompaña ne’e manan no implementa liu-husi konsensu ida.

Tanba ne’e, tuir relatóriu anuál CAC nian kada tinan ilustra katak, tipu korrupsaun boot mak abuzu poder, tuir partisipasaun ekonomia iha negósiu no mós subornu (korrupsaun ativa no pásiva). Tuir estimasaun, iha tinan lima (2018-2022) ikus, jeralmente CAC investiga ona kazu korrupsaun ho tipu abuzu poder hamutuk 64, partisipasaun ekonomia iha negósiu 37 no subornu (korrupsaun ativa no pásiva) hamutuk 18.

  1. c) Risku korrupsaun iha prosesu implementasaun projetu

Iha ku’ak rua mak baibain hamosu korrupsaun durante iha prosesu implementa projetu konstrusaun ba obra ida. Ku’ak ida mak subornu ne’e rasik. Ku’ak seluk mak fraude iha konstrusaun. Normalmente, subornu akontese, tanba kompaña ida sogok enjiñeiru sira ne’ebé halo supervizaun no monitorizasaun ba projetu ne’e. Ida-ne’e dalabarak akontese, bainhira kompaña ida tenta halo konspirasaun ho enjiñeiru sira hodi redus volume no espesifikasaun husi materiál kontrusaun nian no la halo tuir dezeñu ne’ebé iha. Ida-ne’e mós bele akontese kontrariamente kuandu enjiñeiru sira tenta halo konsensu ruma ho kompania sira ba sira-nia interrese hamutuk.

Entantu, kona-ba fraude iha konstrusaun akontese, tanba dalabarak iha prosesu kontrusaun, enjiñeiru sira la halo kontrolu ho didi’ak ba materiál konstrusaun sira ne’ebé hatuur iha BoQ. Ho ida-ne’e, kompania sira halo manipulasaun hodi redus volume no kualidade espesifikasaun materiál sira ne’ebé uza hodi halo konstrusaun. Tanba ne’e, kuandu enjiñeiru ida mezmu bele iha integridade aas, maibé la halo kontrolu didi’ak ku’ak sira ne’e, iha poténsia boot loos atu halakon kualidade projetu konstrusaun ida, no fó ksolok boot ba kompania sira hodi akumula lukru boot.

Tuir estudu ida halo rasik husi KAFI relata katak, avaliasaun ba projetu 36 hosi totál projetu 1.972 ne’ebé 100% konkluidu, rezultadu hatudu katak, projetu barak mak implementa ona la liuhusi estudu viabilidade, ne’ebé rezulta iha implementasaun ho kustu aas liu nia valór reál, (Tatoli, 2023).

  1. d) Risku korrupsaun iha prosesu pagamentu projetu

Projetu ida bainhira termina no atu rekomenda ba pagamentu, baibain mós mosu subornu iha ne’eba. Iha kazu balun, engineiru ne’ebé halo inspeksaun ba projetu hodi rekomenda ba pagamentu, halo meius ka maneira oioin hodi buka lukru husi kompaña ne’ebé implementa projetu. Ku’ak ida-ne’e dalabalun akontese, tanba engineiru ida buka razaun oioin hodi buka lukru liuhusi la asina rekomendasaun pagamentu ba projetu, ida-ne’e mak tenta ‘obriga’ kompania atu fó subornu hodi hafasil prosesu pagamentu.

 

  1. Mitigasaun risku korrupsaun iha projetu infraestrutura

Atu mitiga no evita tipu krime korrupsaun sira hanesan ku’ak sira temi iha leten, iha dalan balun ne’ebé Estadu bele foti. Dalan ideál balun ne’ebé ha’u bele propoin iha ne’e mak, presiza hadi’a sistema balun iha administrasaun públika Estadu nian. Entre ida mak planeamentu ba setór infraestrutura ne’ebé sustentavel, efisiente no efikaz, transparánsia iha prosesu sira foti desizaun públika iha prosesu aprovizionamentu sira, involve entidade kontrolu sira no konsultasaun publiku ida luan iha prosesu planeamentu no aprovizionamentu, inklui iha implementasaun projetu iha terrenu to’o pagamentu finál. Ida seluk, kria laboratóriu nasionál ida ba projetu konstrusaun ne’ebé kualidade, involve tékniku enjiñeiru sira hotu-hotu, inklui akadémiku sira hodi fó asesoria no kontrola lisuk projetu sira.

  1. a) Transparánsia iha prosesu aprovizionamentu

Estadu presiza kria sistema eletróniku ida-ne’ebé asesivel ba ema hotu atu asesu informasaun relasiona ho prosesu sira aprovizionamentu. Kualker projetu Estadu nian ne’ebé CNA atu tenderiza ba públiku tenke nakloke ba públiku atu hatene, liu-liu síklu sira prosesu aprovizionamentu durante hahú prosesu selesaun dokumentu sira no to’o ba desizaun finál. Nune’e, desizaun sira ne’ebé fó ba kompaña ida manan, bele garante nia prinsipiu legalidade, justu no iha efisiénsia no efikasia.

La’ós de’it prosesu aprovizionamentu ne’e, maibé projetu sira ne’ebé implementa iha baze, tenke iha mapamentu klaru, nakloke ba públiku atu tulun públiku bele kontrola mós. Ida-ne’e atu evita projetu mate klamar sira ne’ebé akontese ona iha tempu pasadu, labele kontinua reproduz fali.

  1. b) Envolvimentu orgaun kontrolu iha planeamentu no implementasaun projetu

Involvimentu entidade kontrolu hamutuk ho dono projetu sira no konsultasaun públiku iha planeamentu no implementasaun projetu sira ne’e importante tebes. Partikularmente, órgaun kontrolu independente sira hanesan CAC. CAC presiza involve nia espesialista sira no tékniku enjiñeiru sira iha prosesu sira hanesan ne’e hodi tulun fó akonsellamentu sira ba dono projetu sira atu dezena planu sira ne’ebé sees husi risku sira korrupsaun nian.

Envolvimentu iha planeamentu ne’e importante hanesan fó pareser legál no tékniku sira relasiona ho prevensaun korrupsaun nian. Ida seluk mak hamutuk ho dono projetu no kompania responsavel sira ne’ebé implementa projetu iha terrenu atu halo kontrolu ida efetivu. Involvimentu ida-ne’e, la signifika CAC mak atu monitoriza fali projetu sira ne’e hodi kontrola nia kualidade, maibé CAC nia involvimentu iha ne’e atu fó atensaun de’it ba entidade naka’it sira kona-ba risku sira korrupsaun nian. Partikularmente, fó hanoin tékniku donu projetu sira atu superviziona beibeik no didi’ak projetu konstrusaun sira hodi evita Estadu hetan prezuizu.

  1. c) Kria no harmoniza laboratóriu nasionál integradu ida

Kria no harmoniza laboratóriu nasionál ne’e nesesariu liu. Iha Timor, laboratóriu ba setór infraestrutura la integra iha fatin ida. MOP iha rásik ninia laboratóriun, no mós ADN iha ketak fali ninian. Loloos kualker projetu sira fundu infraestrutura nian, kria de’it laboratóriu nasionál ida-ne’ebé integradu no kualifikadu. Tékniku sira husi MOP no ADN tenke servisu hamutuk, se di’ak liutan envolve mós tékniku sira husi CAC iha ne’ebá. Presiza duni ekipa integradu ida atu bele kontrola projetu ida efetivu no kontrola malu evita krime sira korrupsaun nian iha prosesu konstrusaun.

Tanbasá tenke involve CAC iha ne’eba? Razaun ne’e tanba atu evita fraude iha kontrusaun. Presiza tékniku sira CAC nian iha laboratorium atu bele tulun prevene krime sira ne’ebé forma ho redusaun kualidade materiál konstrusaun sira. La’ós de’it envolvimentu sira iha servisu sira prevensaun ninian, maibé mós bele tulun ekipa servisu prevensaun nian detekta iregularidade sira iha fraude konstrusaun hodi tulun fali servisu investigasaun kriminál nian halo investigasaun hodi prosesa autór kriminozu sira ba tribunál.

 

  1. Konkluzaun

Dezenvolvimentu infraestrutura iha Timor sei la’o ho ain kude’ik, tanba sei iha lakuna barak no sistema planeamentu no kontrolu ne’ebé fraku tebes iha administrasaun públika nian. Risku korrupsaun boot liu iha ezekusaun orsamentu infraestrutura nian mak planu ne’ebé la adekuadu, aktu sira subornu no konflitu interrese iha prosesu aprovizionamentu, inklui prátika subornu no fraude sira iha implementasaun projetu konstrusaun iha terrenu. Atu prevene poténsia krime sira ne’e, presiza sistema planeamentu ida di’ak, kria sistema eletróniku ida di’ak hodi garante transparánsia públiku no ida seluk maka kria relasaun servisu konjunta ida di’ak entre órgaun implementadór no kontrolu sira hodi prevene lisuk risku sira ne’ebé hamosu krime korrupsaun iha inísiu planeamentu to’o pagamentu finál.

Endnotes:

Planu Estratejiku Dezenvolvimentu Nasionál (PEDN) 2011-2030.

Materia formasaun KAFI ba CAC

Infraestructute Fund Administration Manuál 2020

Lei nu 7/2020- MPCC

Relatoriu Anuál CAC Tinan 2018- 2022

Notisia Jornál Timor-Post tinan 2022

Notisia Online Tatoli tinan 2023

 

 

iklan
iklan

Leave a Reply

iklan
error: Content is protected !!