iklan

EDUKASAUN, MUNISÍPIU, VIQUEQUE

EBF Uaibira Afaloikai menus profesór no saladeaula

EBF Uaibira Afaloikai menus profesór no saladeaula

Kondisaun atuál sala aula Ensinu Báziku Filiál (EBF) Uaibira, suku Afaloikai, postu Uatulari, munisípiu Viqueque ne’ebé lokaliza iha área remota. Imajén Tatoli/Vitorino Lopes da Costa.

VIQUEQUE, 11 juñu  2024 (TATOLI)- Diretór Ensinu Báziku Central (EBC,sigla portugés) Haenaudere, Suku Afaloikai, Postu Administrativu Uatulari, Munisípiu Viqueque, Aquilis Martins, informa, daudaun EBF siklu 1,2 no 3 Uaibira enfrenta menus profesór hodi hanorin no saladeaula la sufsiente hodi uza ba prosesu apredijazen.

“Ami-nia eskola EBF Uaibira ne’e profesór na’in-tolu maka hanorin primeiru siklu to’o fali  siklu 3, depois númeru estudante ba anu letivu tinan ida-ne’e hamutuk 100. Nune’e ami-nia  profesór fahe oras hanorin estudante  la sufisente hodi kobre estudante sira”,  Aquilis Martins, hateten ba Agência Tatoli, iha EBC Haenaudere, ohin.

 Diretór ne’e dehan dezlokasaun profesór foin lalais ne’e EBF Uaibira la hetan, nune’e profesór na’in-tolu mak kontinua  hanorin estudante sira tanba materia sira barak.

“Maibé, ita ko’alia loos de’it profesór na’in-tolu labele atu hanorin estudante no ita-nia oan sira maka sai vitima ba prosesu apredijazen. Tanba ne’e, ha’u enkontru ho profesór sira hodi buka alternativu reforsa EBF Uaibira ne’ebé hanoin estudante klase 7 ba fali sentru, maibé ita haree estudante mesak ida ki’ik la’o distánsia dook no ami haruka profesór mak bá  fali hanorin”, katak.

Alende ne’e,  EBF Uaibira iha saladeaula foun tolu kondisaun di’ak tanba iha tinan kotuk  hetan  projetu komunitária hodi konstrui sala tolu, maibé sala tolu mak kondisaun grave tanba anin sobu iha tinan 2023.

“Ami halo  ona pedidu ba servisu edukasaun hodi apoiu materiál emerjénsia hanesan kalen, besi hodi ami hadi’a edifísiu eskola tuan ne’e hodi uza, maibé to’o agora seidauk iha resposta ruma.  Se ita hein prosesu kontrusaun ne’e kle’ur”, nia sujere.

Ho preokupasaun sira-ne’e,  Nia husu ba Ministra Edukasaun (ME) ba futuru rekrutamentu profesór karik keta haluha EBF Uaibira hodi koloka profesór no hadi’a mós edifísiu eskola EBF Uaibira.

“Problema menus profesór ne’e ami enfrenta tinan naruk, nune’e espera ba oin, Governu bele tau ba atensaun, se la’e ita-nia oan estudante sira mak sai vitima”, katak.

Tuir dadús totál estudante na’in-100, kompostu husi klase 1 na’in-23, klase 2 na’in-14, klase 3 na’in-17,  klase 4 na’in-11, klase 5 na’in-15, klase 6 na’in-8 no klase 7 na’in-12 ho totál profesór na’in-tolu.

Notisia relevante:Projetu konstrusaun eskola tinan-2021, falta 14 mak seidauk finaliza

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!