EDUKASAUN

Eskola balun kontinua menus profesór

Eskola balun kontinua menus profesór

Diretora Eskola EBC Farol, Filomena Freitas. Imajen Tatoli/Francisco Sony

DILI, 11 juñu 2024 (TATOLI)–Eskola sira iha territóriu kontinua menus profesór ne’ebé kondisaun ne’e sai preokupasaun ba públiku, liu-liu estudante no inan-aman sira, maski Ministériu Edukasaun (ME) koloka ona profesór rekrutadu liuhusi programa bolsa kandidatu.

“Foin lalais Ministériu Edukasaun aloka ona profesór na’in-tolu, ne’ebé fahe ba língua portugeza, inglés no matemátika. Maibé ida-ne’e seidauk to’o,” Diretora Eskola Ensinu Báziku Sentrál (EBC, sigla portugés), Filomena Freitas, informa ba Agência Tatoli, iha ninia knaar fatin, Farol, tersa ne’e.

ME koloka profesór ba terseiru siklu (7º, 8º no 9º anos), enkuantu eskola referidu sei presiza tan profesór.

“Profesór sira-ne’e ba terseiru siklu nian de’it maibé ba 8º ano nian. Ami-nia profesór falta mak ba 9º ano maibé foti fali seluk hodi kompleta. Agora prenxe hotu ona, falta 7º no  8º ano mak menus, inklui profesór ba primeiru no segundu siklu mak falta de’it ema na’in-ida ka rua. Ba 2º ano bainhira ita fó matéria prátika hanesan desportu hanesan jogu ruma hodi haree no fó valór ba sira,” nia akresenta.

Totál profesór iha Eskola EBC Farol hamutuk 60, ho totál estudante 2.097 kompostu husi mane 986 no feto 1.011.

Iha sorin seluk, Diretór Eskola EBC 30 de Agosto, Vitorino Varia, preokupa tanba eskola ne’e rasik mós menus profesór.

“Ami presiza duni profesór na’in-hitu. Tanba profesór sira-ne’e nia kontratu ramata iha loron 31 dezembru 2023 no to’o nia matéria husik de’it. Ita-nia estudante sira sai vítima, ministériu la koloka tan profesór mai,” Diretór Eskola informa.

Notísia relevante : ME koloka ona profesór 480 ba eskola 276 iha territóriu tomak

Profesór na’in-hitu ne’e kompostu husi kontratadu na’in-lima no voluntáriu na’in-rua.

“Kuandu profesór laiha, labarik sira mak sai vítima, nune’e Ministériu Edukasaun tenke toma atensaun. Nune’e ha’u fó ona mensajen ba Diretór Rekursu Umanu no ha’u rasik mak halo karta ba Ministériu Edukasaun atu koloka ema nain-hitu ne’e ho urjentemente maibé finalidade ita la hetan,” nia lamenta.

Matéria ne’ebé to’o agora profesór laiha mak lian portugés, matemátika, tetún, desportu, istória no jeografia.

“Ita lahatene tanba saida Ministériu Edukasaun la koloka profesór mai iha eskola ne’e. Agora sira dehan bazeia ba inspensaun no foti dadus profesór sira iha ne’e hamutuk na’in-58, nune’e bazeia ba sira-nia estimasaun katak profesór kompletu ona,” nia tenik.

Diretór relata, Eskola ne’e iha sala 36, tanba ne’e tuir Eskola nia estimasaun katak kolokasaun ne’e la to’o.

“Maibé ami-nia na’i-ulun sira dehan to’o, realidade mak profesór la tama estudante abandona iha li’ur de’it. Dezde profesór na’in-hitu ne’e para hanorin, labarik sira abandona de’it no ita kuandu la koloka profesór mai iha ne’e segundu períodu sei nafatin iha problema ba estudante sira hanesan ho períodu dahuluk. Tanba bainhira profesór laiha, ba ida-ne’ebé la’ós ita-nia área ne’e ita halo de’it avaliasaun ba estudante sira,” nia dehan.

Diretór Eskola 28 de Novembro Becora, Manuel Amaral, informa Eskola Ensinu Sekundáriu Tékniku Vokasionál no Eskola 28 Novembru Becora, menus profesór iha área tékniku nian, nune’e bainhira halo rekrutamentu profesór agora ministériu bele konsidera mós.

“Ita iha profesor 43, maibé ba disiplina produtivu ka tékniku nian iha na’in-sia de’it, seluk ne’e ba disiplina jerál. Iha eskola ida-ne’e profesór ba disiplina produtivu ne’e menus tebes, tanba ne’e presiza aumenta tanba disiplina ne’e iha prátika mós. Tanba ne’e, Ministériu Edukasaun daudaun ne’e loke vaga ba profesór sira husu atu tau atensaun ba kestaun ne’e, katak rejeita mós ema ne’ebé espesialidade ba área tékniku nian, nune’e bele koloka ba eskola tékniku sira iha Timor-Leste,” nia dehan iha resintu Eskola.

Diretór Eskola haktuir, profesór ida mak rezigna-an tiha no ida seluk kontratu ramata iha dezembru liubá, tanba ne’e fó impaktu ba prosesu aprendizajen, liu-liu disiplina produtivu hanesan departamentu eletrisidade tanba hela de’it ona profesór ida, tanba ne’e nia mós sei tun direita hodi hanorin.

“Profesor na’in-ida ne’ebé nia kontratu termina ne’e la tama ona ka la hanorin ona estudante. Prosesa aprendizajen la’o normál hanesan tinan-tinan iha semana kotuk maibé problema ba ita mak rekursu umanu ka professor mak menus, liliu profesor ba disiplina produtivu mak menus tanba ita iha eskola ida-ne’e iha professor na’in -rua kada departamentu maibé ida-ne’e mós seidauk sufisente kuantu mais kolega ida nia kontratu termina tan iha 31 dezembru liubá. Ida-ne’e sai kestaun boot ba ami no ha’u nafatin esforsu hodi kontribui mós ha’u-nia oras hodi hanorin”, nia dehan.

Profesor hamutuk 43 kompostu husi feto 17 restante mane, ho nia estudante hamutuk  518 no iha Departamentu haat hanesan arte gráfika, eletrónika, eletresidade no informátika. Husi departamento haat ne’e buat ne’ebé sai kestaun mak prátika hanesan ekipamentu no materiál la sufisente.

Adjuntu Diretór Eskola Ensinu Sekundáriu Jerál (ESJ) 04 de Setembro UNAMET, Balide, Alexandre da Costa, husu ministériu atu aumenta tab profesór 16 hodi bele kompleta no normaliza aula.

“Ida-ne’e sei afeta ba ezame ida agora ne’e tanba menus profesór no aula la’o, entaun konserteza sei prejudika ba ezame ne’e. Maibé, ida-ne’e ami hein de’it desizaun husi ministériu tanba matéria ne’ebé profesór laiha ne’e oinsá mak mai atribui ba estudante sira-nia valór,” nia salienta.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!