DESPORTU

Euro 2024 bele asiste liuhusi telefone

Euro 2024 bele asiste liuhusi telefone

Asina akordu entre Telemor ho ETO

DILI, 11 juñu 2024 (TATOLI) –Kampionatu Euro 2024 edisaun da-17 ne’ebé sei realiza iha Alemaña, entre loron 14 juñu no 14 jullu 2024, bele asiste liuhusi telefone ka telemóvel.

Novidade di’ak ba “Bola mania” Timor-Leste, tanba atu fasilita eventu tinan haat dala ida-ne’e, empreza telekomunikasaun Telemor selebra ona akordu kooperasaun hodi serbisu hamutuk ho ETO atubele transmite iha TIMOR-TV.

“Uza telemovel atu haree EURO iha kualker tempu, iha fatin ne’ebé de’it, Telemor lori EURO ba parte hotu iha Timór,” refere komunikadu imprensa husi kompañia ho lema Hetan di’ak liu, ba TATOLI, ohin.

Transmisaun kampionatu futebol UEFA, Telemor no ETO asina akordu hamutuk ne’e nu’udar kontinuasaun, hodi kobre área kooperasaun balun, hanesan reklamasaun servisu Telemor nian iha kanál ETO no hatudu kanál ETO nian servisu iha plataforma Telemor nian husi televizaun Timor. Nune’e parte rua garante iha benefísiu mútua iha implementasaun akordu ida-ne’e, iha ámbitu fó sai desportu ‘prestíjiu’ – Euro 2024.

“Fiar katak sei lori benefísiu ba parte rua durante implementasaun akordu ida-ne’e. No ita hotu hein katak parseria entre Telemor no ETO sei lori forsa no forte ida atu serve di’ak liu sosiedade timoroan liuhusi kanál ETO no servisu Telemor,” komunikadu ne’e sita.

Entretantu, Kampionatu Euro 2024 sei partisipa husi grupu neen – Grupu A, B, C, D, E no F. Iha tabela klasifikasaun Grupu A kompostu husi Alemaña, Escócia, Hungria no Suiça.

Grupu B, España, Croácia, Itália, Albania no Grupu C mak Eslovênia, Dinamarca, Sérvia no Inglatera.

Enkuantu, Grupu D kompostu husi Polónia, Holanda, Áustria no França. Grupu E, Bélgica, Eslováquia, Romênia no Ucrânia no ikusliu Grupu F mak Turkia, Georgia, Portugal no Tchêquia.

Kualifikasaun ba grupu sira ne’e, tuir tabela klasifikasaun UEFA 2024, “Melhores equipas” rua husi kada grupu, kada grupu sei kualifika ba ronde tuirmai. Enkuantu, “Melhores equipa” – ekipa di’ak liu haat, iha terseiru lugar sei kualifika ba ronde tuirmai.

Maneira asesu Euro 2024 iha telefone

  1. Download lai applikasi Timor TV iha playstore, iha telefone;
  2. Uza Simcard Telemor;
  3. Ativa pakote – bele pakote baibain ka pakote promosaun EURO nian

 

Tatoli

iklan
iklan

Leave a Reply

iklan
error: Content is protected !!