EKONOMIA, HEADLINE

KONSSANTIL sujere ba MAPPF aloka orsamentu sufisiente hodi hasa’e produsaun alimentár

KONSSANTIL sujere ba MAPPF aloka orsamentu sufisiente hodi hasa’e produsaun alimentár

Osan dólar amerikanu. Imajen/Espesiál

DILI, 11 Juñu 2024 (TATOLI) – Konsellu Nasionál ba Soberania, Seguransa Alimentár no Nutrisaun iha Timor-Leste (KONSSANTIL) sujere ba Ministériu Agrikultura, Pekuária, Peska no Floresta (MAPPF) atu prevee orsamentu sufisiente iha 2025 hodi responde ba hasa’e produsaun ai-han iha rai-laran.

Daudaun ne’e, produsaun iha país seidauk sufisiente atu responde ba nesesidade populasaun nian, liuliu iha setór agrikultura, pekuária no peska maka KONSANTIL ne’ebé iha papél sei halo koordenasaun ho liña ministeriál sira atu tau prioridade ba Planu Asaun Anuál 2025 ba iha asuntu ne’e.

Diretór-Ezekutivu KONSSANTIL, Komar Mendonça, hateten MAPPF tenke tau orsamentu hodi hasa’e produsaun alimentár, nune’e distribuisaun hahán ba populasaun sufisiente maka sei hamenus taxa má nutrisaun iha país.

KONSSANTIL mós kontinua serbisu hamutuk ho parseiru dezenvolvimentu sira, inklui ajénsia internasionál sira hodi husu kontribuisaun sira-nian ba redusaun taxa má nutrisaun iha nasaun ne’e.

Polítika Governu nian maka to’o 2028 hakarak redús taxa subnutrisaun husi 47% ba 25%. “Ida ne’e kompromisu ne’ebé tau ona iha planu prioridade iha tinan lima ne’e. Atu atinje meta ne’ebé planeia ona maka parte hotu, liuliu liña ministeriál tenke halo ezersísiu boot ida, nune’e bele hamenus má nutrisaun”, sujere.

Nia solisita mós ba ministériu hotu atu tau ona atensaun ba problema ne’e no halo planu integradu, labele halo mesak ne’ebé la refleta ba planu Governu nian no ikus mai sei atinje meta ne’ebé iha.

KONSSANTIL mak órgaun interministeriál ne’ebé responsavel ba koordenasaun hodi elabora, implementa, monitoriza no avalia polítika públika ne’ebé iha relasaun ho seguransa no soberania alimentár no nutrisionál.

Objetivu husi KONSSANTIL maka asegura implementasaun Planu Estratéjiku Dezenvolvimentu Nasionál no programa Governu nian kona-ba matéria ne’e, dezenvolve no promove mekanizmu atu halo koordenasaun no hodi reforsa kapasidade instituisaun públika sira no rekursu hirak ne’ebé eziste ona, atubele redús inseguransa alimentár no má nutrisaun no hodi implementa planu ba seguransa alimentár no nutrisaun.

Nune’e mós, Diretór Nasionál Agrikultura no Ortikultura, Lúcio Ribeiro, haktuir katak polítika MAPPF ba tinan lima nia laran ne’e klaru ona katak sei hasa’e produsaun agríkola ba 70%, nune’e bele asegura hahán ba populasaun sira.

“Orsamentu ne’ebé prevee ona hamutuk millaun $70-resin, maibé ne’e depende ba desizaun husi superiór sira atu haree área prioritária sira hodi bele aloka verba sira ne’e atu responde ba problema ba hasa’e produsaun agríkola, nune’e bele ajuda redús taxa má nutrisaun iha Timor-Leste”, adianta.

Asesór polítiku ba Vise-Primeiru-Ministru no Ministru Koordenadór Asuntu Sosiál, Mariano Assanami Sabino, Christopher Henry Samson, haktuir katak Governu hamutuk ho parseiru internasionál sira ne’ebé serbisu iha Timor-Leste kontinua diskute oinsá atu kombate subnutrisaun no inseguransa ai-han iha país.

Lembra katak, iha tinan kotuk, Prezidente Repúblika, José Ramos Horta no Vise-Primeiru-Ministru, Mariano Assanami Sabino, halo ona lansamentu ba programa kombate má nutrisaun iha Timor-Leste, oinsá bele iha integrasaun atividade ida hodi erradika problema ne’e.

Prezidente Repúblika no Vise-Primeiru-Ministru identifika asuntu tolu ne’ebé importante tebes. Dahuluk, oinsá atu haree labarik sira ne’ebé afetadu ba problema má nutrisau, daruak, atu haree ai-han ne’ebé sufisiente no fó kondisaun di’ak ba ema hotu, no datoluk, trata mós situasaun joven sira-nian.

Kontinuasaun ba programa ne’e, ohin, 11 Juñu, Governu kontinua tan atividade ida liuhusi kriasaun grupu traballu ida hodi diskute sobre asuntu ai-han no nutrisaun, ne’ebé organiza husi Ministériu Saúde no MAPPF.

“Ita bele fó resposta ba problema má nutrisaun ne’ebé akontese no oras ne’e ninia persentajen kuaze 47% ne’ebé afeta ba labarik sira husi tinan lima mai kraik ho raes badak. Problema sira ne’e mosu tanba mai husi bee, hahán ne’ebé ladún saudavel no laiha nutrisaun”, esplika.

Tanba ne’e, atividade referida bolu mós parseiru dezenvolvimentu hodi diskute kona-ba problema má nutrisaun, saida mak atu halo hodi redús kestaun ne’e iha tinan tolu nia laran.

Notísia relevante: Labarik 47% afeta má nutrisaun tanba la konsome ai-han nutritiva

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!