iklan

HEADLINE, KAPITÁL

MAE hein relatóriu finál fó pose ba xefe suku foun-10

MAE hein relatóriu finál fó pose ba xefe suku foun-10

Diretór Jerál Dezentralizasun no Governu Lokál husi MAE, António Agusto Guterres. Imajen Tatoli/Arminda Fonseca

DILI, 11 juñu 2024 (TATOLI)—Ministériu Administrasaun Estatál (MAE) liuhusi Diresaun Jerál Desentralizasaun Governu Lokál (DGDGL, sigla portugés), daudaun ne’e, seidauk simu hotu relatóriu finál husi xefe suku foun lima, ne’ebé foin lalais kompete iha eleisaun órgaun suku ba volta daruak no datoluk.

Diretór Jerál Desentralizasaun Dezenvolvimentu Governu Lokál, António Agusto Guterres, hateten, DNDGL tenke simu relatóriu finál husi xefe suku foun lima molok xefe suku foun na’in-10 atu simu pose.

“Ita foin simu relatóriu finál husi xefe suku Builo, Viqueque nian, relatóriu ba suku haat seluk hanesan Lequitura, Aileu, Bebonuk, Manleuana, Madohi munisípiu Dili, seidauk tama hotu, entaun hein relatóriu finál sira ne’e mai hotu ita kompila hotu haruka ba Ministru Administrasaun Estatál, Tomas Cabral no hetan ona publikasaun iha Jornál Repúblika mak foin fó tomada pose, ne’ebé sedu iha fulan ne’e, tarde liu iha fulan oin,” António Agusto, informa ba Agência Tatoli, iha ninia knaar-fatin, Colmera, tersa ne’e.

Notísia relevante : Suku lima hakat ba eleisaun segunda volta iha loron 13 maiu

Relatóriu finál ne’ebé DGDGL presiza kompila hafoin haruka ba ministru, nia prosesu husi munisípiu haruka mai iha Diresaun Nasionál Administrasaun Suku mak DNDGL haree verifika ba naran sira hanesan xefe suku, xefe aldeia, delegadu, delegada, juventude feto, mane no lia na’in sira ne’e loos hotu ona mak haruka ba ministru.

Ministru Administrasaun Estatál, Tomas Cabral, mak sei deside data tomada pose, bainhira naran xefe suku sira públika ona iha jornál repúblika.

Suku lima ne’ebé hakat ba volta daruak husi munisípiu Dili maka suku Manleuana, Madohi, Bebonuk, husi munisípiu Viqueque maka suku Builo, no munisípiu Aileu maka suku Lequitura.

Enkuantu suku lima ne’ebé xefe suku eleitu ka manán maioria absoluta iha volta daruak mak hanesan suku Bocolelo iha postu administrativu Laulara munisípiu Aileu, suku Mantelolão iha postu administrativu Metinaro munisípiu Dili, suku Ailok iha postu administrativu Cristo Rei munisípiu Dili, suku Sikone Diloli no suku Laicore iha postu administrativu Lacló munisípiu Manatuto

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!