DILI, 30 abríl 2024 (TATOLI)—Eleisaun órgaun suku 10 ne’ebé realiza iha loron 27 abríl tinan ne’e hatudu rezultadu suku lima tenke hakat ba segunda volta iha loron 13 maiu tanba la liu barreira.
Eleisaun foin lalais ne’e hahú simultáneamente tuku 07:00 dadeer iha aldeia 52, ne’ebé ba dahuluk forma meza eleitorál hodi bele konstitui membru meza eleitorál na’in-tolu, tuku 08:00 dadeer hahú simu kandidatura xefe aldeia, delegada no delegadu, ne’ebé aprezenta ona iha loron 12 abríl.
“Bainhira aprezenta hotu, eleisaun hahú tuku 09:00 dadersaan to’o kontajen votu, entaun husi rezultadu eleisaun, xefe suku lima mak eleitu iha primeira ronda no suku lima seluk avansa ba segunda ronda, ne’ebé sei hala’o iha loron 13 maiu tinan ne’e tanba la liu barreira 50%+1,” Diretór Ezekutivu Sekretariadu Tékniku Administrasaun Eleitorál (STAE), Elviro Fernandes Moniz, informa ba Agência Tatoli iha ninia knaar fatin, Caicoli, tersa ne’e.
Notísia relevante : Eleitór 33.176 husi suku 10 sei partisipa eleisaun iha fulan ne’e
Nune’e, xefe aldeia 52 eleitu hotu kedas ona hanesan mós delegadu 52 no delegada 52.
Suku lima ne’ebé xefe suku eleitu ka manán maioria absoluta tanba liu barreira 50%+1 mak hanesan suku Bocolelo iha postu administrativu Laulara munisípiu Aileu, suku Mantelolão iha postu administrativu Metinaro munisípiu Dili, suku Ailok iha postu administrativu Cristo Rei munisípiu Dili, suku Sikone-Diloli no suku Laicore iha postu administrativu Lacló munisípiu Manatuto.
Enkuantu, suku lima ne’ebé la liu barreira mak hanesan suku Lequitura iha postu administrativu Aileu munisípiu Aileu, suku Madohi, Bebonuk, no Maleuana iha postu administrativu Don Aleixo munisípiu Dili no suku Builo iha postu administrativu Ossu munisípiu Viqueque.
Diretór Ezekutivu STAE dehan, ba suku sira ne’ebé eleitu ona loron 08 maiu 2024 sei halo reuniaun dahuluk iha ida-idak ninia suku ne’ebé prezide husi xefe suku eleitu hodi hili lia-na’in inklui reprezentante joven feto no joven mane hodi kompleta estrutura konsellu suku.
“Ba eleisaun órgaun suku 10 foin lalais ne’e, dadus ne’ebé ita rekolla totál eleitór rejistadu 33.175, husi númeru ne’e, eleitór ne’ebé partisipa vota 17.598 no la partisipa vota 15.577. Razaun la partisipa vota maka balun lakohi vota, balun okupadu serbisu sai tiha, balun la rona informasaun no razaun seluk tan,” nia akresenta.
Órgaun eleitorál nota katak situasaun durante prosesu eleisaun la’o normál maski akontese lamentasaun no protesta balun tanba fatin balun eleitór barak maibé atendimentu no mekanizmu, laiha pasiénsia, hirus malu, fila tiha to’o parte lorokraik tuku 15:00 atu taka mak eleitór balun mai ikus no protesta, maibé ekipa responsável sira konsege rezolve kedas situasaun momentu ne’ebá.
STAE nia preparasaun ba eleisaun segunda volta maka iha semana ne’e nia-laran sei halo imprime buletin votu foun hamutuk 30.400 ho ninia kustu $15.200.
“Ita iha ona lista kandidatu na’in-10 ba suku lima, entaun ita sei halo dezeñu no semana ne’e ita sei lori ba gráfiku nasionál hodi imprime,” nia tenik.
Jornalista : Arminda Fonseca
Editora : Julia Chatarina
