iklan

EDUKASAUN, HEADLINE

MAE no ME iha kompromisu manorin sira labele asume kargu iha estrutura munisipál

MAE no ME iha kompromisu manorin sira labele asume kargu iha estrutura munisipál

Diretór Jerál Dezentralizasun no Governu Lokál husi MAE, António Agusto Guterres. Imajen Tatoli/Arminda Fonseca

DILI, 11 juñu 2024 (TATOLI)—Ministériu Administrasaun Estatál (MAE) no Ministériu Edukasaun (ME) iha ona kompromisu katak manorin sira ne’ebé daudaun hala’o serbisu iha nível edukasaun labele asume kargu ruma iha estrutura munisipál.

“Polítika MAE no ME iha ona kompromisu Prezidente Autoridade Munisípiu labele nomea manorin sira-ne’ebé daudaun hala’o serbisu iha nível edukasaun nian asume kargu ruma hodi komplementa estrutura munisipál ninian, signifika sira ne’ebé rejime espesiál labele rejime jerál,” Diretór Jerál Desentralizasaun Governu Lokál, António Agusto Guterres, informa ba Agência Tatoli, iha ninia knaar fatin, Colmera, tersa ne’e.

Haree ba kompromisu ne’ebé iha daudaun, munisípiu balun estrutura seidauk kompleta.

Rezultadu estrutura ba autoridade munisipál 12 priense hotu ona, falta viqueque mak diresaun rua kona-ba asaun sosiál no protesaun dezastre naturál.

“Manufahi nian ita presiza priense protesaun dezastre naturál no husi Ermera asaun sosiál seidauk no Dili nian rejistu notariadu seidauk, sira-ne’ebé seidauk priense ne’e tanba momentu ita la identifika didi’ak no balun nomeadu iha kargu seluk, entaun la hola parte iha tomada pose, liu-liu sira-ne’ebé hanesan manorin,” nia akresenta.

Notísia relevante : Implementa polítika desentralizasaun administrativa, Covalima kompleta estrutura munisipál

Munisípiu ne’ebé daudaun estrutura seidauk kompleta, atu prinese Prezidente Autoridade Munisípiu (PAM) sira mak haruka naran mai liuhusi Diresaun Jerál Desentralizasaun Governu Lokál (DGDGL, sigla portugés) mak halo kompilasaun ba lista sira ne’e hodi haruka ba ministru hodi deside.

“Ida-ne’e mak ita-nia serbisu preparasaun ba desentralizasaun Governu lokál antes to’o eleisaun ita tenke priense hotu estrutura munisipál no postu administrativu sira,” nia tenik.

Serbisu seluk ne’ebé daudaun MAE halo ba iha preparasaun desentralizasaun Governu lokál ne’e DGDGL no Diresaun Jerál Simplifikasaun Modernizasaun Administrasaun Lokál (DGSMAL, sigla portugés) halo ona levantamentu dadus ba munisípiu hotu.

“Daudaun ita prepara hela rezultadu relatóriu levantamentu dadus ba ministru no relatóriu pre-elimináriu bele divulga iha juñu ka jullu ba PAM sira atu sira hatene kondisaun ezistente agora iha munisípiu sira ne’e la’o oinsá ona no sei sai oinsá,” nia dehan.

Kondisaun ezistente sira-ne’ebé halo hela levantamentu dadus ne’e mak hanesan kondisaun serbisu, administrasaun, finansa, rekursu umanu, planu asaun anuál, investimentu anuál, planu formasaun rekursu umanu anualmente, no seluk tan.

“Bainhira rezultadu kondisaun ezistente ne’e hotu ona, DGDGL no DGSMAL sei hamutuk estabelese fali kalendáriu ba avaliasaun kondisaun mínimu iha tinan-2025. Kona-ba kondisaun mínimu ne’e sei haree liubá rekursu umanu, infraestrutura báziku la’o to’o iha ne’ebé, kondisaun ekipamentu apropriadu iha munisípiu, métodu hotu ne’ebé PAM sira uza halo serbisu ne’e uza  tuir duni polítika no programa Governu sentrál nian ne’ebé fó ba sira ka lae ikus mak ita haree informasaun teknolojia nian. Ne’ebé prosesu hotu agora la’o hela,” nia esplika.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!