MAPPF submete karta ba KFP hodi justifika funsionáriu sira tama tarde

DILI, 11 Juñu 2024 (TATOLI) – Diresaun-Jerál Koorporativu no Diresaun Nasionál Rekursu Umanu, Ministériu Agrikultura, Pekuária, Peska no Floresta (MAPPF), aprezenta karta ba Komisaun Funsaun Públika (KFP) hodi halo justifikasaun kona-ba funsionáriu 80-resin ne’ebé KFP identifika tama serbisu tarde.

Diretór Nasionál Rekursu Umanu, Hipólito da Costa, dehan justifikasaun ne’e halo tanba avaliasaun ne’ebé Komisaun Anti-Korrupsaun (KAK) no KFP halo, foin lalais ne’e, hetan funsionáriu Ministériu Agrikultura tama tarde.

“KFP no KAK mai halo observasaun hodi avalia serbisu iha MAPPF no konsege identifika iha funsionáriu balun maka tama serbisu tarde. Sira informa mai ami tenke halo justifikasaun ba KAK no KFP hodi esplika bazeia ba lista prezensa husi kada diresaun sira”, dirijente ne’e hateten, ohin.

Diretór ne’e realsa katak KAK no KFP toman rasik funsionáriu sira ne’ebé tama tarde, tanba ne’e sira husu ba ministériu atu hadi’a sistema atu labele akontese tan iha futuru. Sujestaun ne’ebé KAK no KFP fó mak lista prezensa no atividade sira husi funsionáriu sira-nian tenke submete ho justifikasaun sira.

Hipólito da Costa esplika katak lista prezensa no atividade funsionáriu sira ne’e tenke aprezenta ba KFP ho razaun atu sira bele akompaña atividade sira ne’ebé serbisu-na’in ida halo kada loron, nune’e bele iha desizaun ruma iha futuru, tanba observasaun ne’ebé KFP no KAK halo ona iha semana hirak liubá iha duni asaun konkreta.

“Funsionáriu balun ladún konkorda tanba sira barak maka mai tuku 08:15, maibé [absénsia] taka tiha ona, tanba ne’e maka sira husu regra loloos kona-ba serbisu nian ne’e hahú tuku hira? Tuir lei ne’e, tama tuku 08:00. Ne’e duni, ministériu sei submete lista hodi kumpre pedidu KFP nian”, realsa.

Karta justifikasaun ne’e asina husi Diretór-Jerál Koorporativu MAPPF no iha konteúdu esplika razaun sira funsionáriu tama tarde, tanba iha ministériu iha lista prezensa manuál no eletrónika.

MAPPF iha funsionáriu permanente hamutuk 600-resin, ajente administrasaun publika 369-resin no kazuál 680. Funsionáriu sira maioria iha munisípiu hamutuk 50%.

Notísia relevante: KFP rekolla dadus funsionáriu sira iha Ministériu Agrikultura

Jornalista: Tomé Amado

Editora: Maria Auxiliadora