DILI, 20 fevereiru 2024 (TATOLI) – Komisaun Funsaun Públika (KFP) rekolla dadus funsionáriu sira iha Ministériu Agrikultura, Pekuária, Peska no Floresta (MAPPF), nune’e bele kompila ho dadus administrasaun públika nian.
Komisáriu Funsaun Públika ba Asuntu Dixiplinár, Agapito da Conceição, hatete liuhusi rekolla dadus ida ne’e bele sai hanesan informasaun ida ba Governu ligadu ho reforma administrasaun públika nian. “Nune’e, ami bele haree lakuna no dezafiu sira ne’ebé maka akontese iha ministériu nia laran, inklui ministériu sira ne’ebé maka ami halo diagnóstika uluk ona”, Agapito da Conceição hatete iha Comoro, ohin.
Aleinde MAPPF, KFP mós rekolla ona dadus funsionáriu permanente no ajente administrasaun públika sira iha Ministériu Saúde, Edukasaun, Estatál no Obra Públika ne’ebé iha funsionáriu barak. Entretantu, ba rekolla dadus funsionáriu kazuál no kontratadu termu sertu sira-nian ne’e la’ós kompeténsia KFP nian, tanba prosesu rekrutamentu latama iha Funsaun Públika.
Agapito da Conceição esplika katak Komisaun foti ona dadus hodi halo estudu depois maka relata ninia rezultadu ba Governu. “Maneira saida maka Komisaun halo atu hetan dadus husi kada ministériu sira ne’e maka liuhusi prosesu entrevista ho dirijente másimu sira hodi hetan dadus detallu kona-ba funsionáriu iha kada ministériu ho ninia lakuna sira”.
Diretór-Jerál Servisu Korporativu husi MAPPF, Rofino Soares Gusmão, hatete liuhusi rekolla dadus ne’e sira bele relata informasaun ba KFP bazeia ba pergunta sira ne’ebé maka husu hodi bele lori prosesu hotu la’o ho di’ak.
Rofino esplika katak MAPPF iha funsionáriu permante 645 no ajente administrasaun públika 379, ne’ebé konta husi kategoria nivel ki’ik ba to’o iha lima.
“Ministériu ne’e boot tanba kobre ninia ramu servisu ne’e hahú husi nasionál ba to’o iha suku no aldeia. Ami konsidera ho númeru funsionáriu 645 ne’e lbele kobre bá fatin sira ne’e hotu, ne’e duni ho estudu ida ne’e bele haree funsionáriu ne’ebé koloka mai ami-nian ministériu ne’e”, dehan.
Ho rekolla dadus ida ne’e, iha futuru ministériu bele iha planu di’ak hodi loke tan prosesu rekrutamentu ba tékniku sira hodi reforsa serbisu iha terrenu, nune’e bele lori program Governu nian atu hasa’e produsaun, liuliu hare, batar, animál no seluk tan hodi bele responde ba nesesidade nasaun nian.
Funsionáriu kazuál sira ne’ebé servisu iha MAPPF nia kontratu termia ona iha 31 dezembru 2023 no daudaun ministériu sei haree númeru funsionáriu ne’ebé eziste ne’e halo saida no depois identifika hodi halo planu no loke prosesu rektutamentu, nune’e bele koloka fali sira tuir ramu ne’ebé iha ona, inklui atu haree mós destinu funsionáriu ne’ebé tama ona idade reforma nomós atu taka fali fatin ne’ebé mamuk tanba funsionáriu lubuk ida maka mate ona.
Jornalista: Tomé Amado
Editora: Maria Auxiliadora
