DILI, 11 juñu 2024 (TATOLI)—Ministériu Edukasaun (ME), tersa ne’e, distribui ona karteira eskolár (meza no kadeira) hamutuk 120 ba Eskola Ensinu Báziku Sentrál (EBC, sigla portugés) Farol.
“Ami-nia pedidu ba Ministériu Edukasaun ba meza ho kadeira hamutuk 300, maibé seidauk to’o, sira haruka uluk 120 meza no 120 kadeira. Restu hein ba segunda faze,” Diretora EBC Farol informa ba Agência Tatoli, iha ninia knaar fatin.
Nia konsidera, karteira eskolár ne’e importante ba estudante sira hodi utiliza durante prosesu aprendizajen iha eskola.
“Ita presiza fasilidade no kondisaun ne’ebé mak di’ak ba estudante sira,” nia akresenta.
Notísia relevante : ME konfirma dadus husi edukasaun munisipál molok distribui karteira eskolár
Diretór Diresaun Nasionál Infransturtura no Edukativu iha ME, Hélio Lopes, hateten, ministériu sei la distribui fasilidade sira tuir pedidu, maibé sei konfirma ho dadus tanba eskola balun kadeira meza iha no di’ak hela, maibé parte eskola husu tan.
“Uza lai ida-ne’ebé mak sei di’ak, la signifika eskola hotu-hotu tenke hetan kadeira no meza ne’ebé foun, ida-ne’ebé a’at ona no labele ona uza fó, no ida-ne’ebé sei di’ak bele uza lai ida-ne’ebé, tempu ruma mak fó. Ita sei sosa tan kadeira no meza rihun 9 to’o rihun 10 atu responde ba eskola sira-ne’ebé mak presiza, inklui eskola sira-ne’ebé mak ita sei halo saladeaula foun iha tempu oin mai,” nia relata..
Eskola balun hetan ona kadeira no meza iha tinan-2022 no foin lalais ME hako akizisaun meza no kaseira rihun ualu, ne’ebé distribui ona.
Jornalista : Osória Marques
Editora : Julia Chatarina
