iklan

BOBONARO, HEADLINE, INKLUZAUN SOSIÁL, MUNISÍPIU

MSSI disemina rejime jurídiku instituisaun solidariedade sosiál iha Bobonaro

MSSI disemina rejime jurídiku instituisaun solidariedade sosiál iha Bobonaro

Ministériu Solidariedade Sosiál (MSSI), disemina dekretu lei númeru 25/2017 kona-ba rejime jurídiku instituisaun solidariedade sosiál ba instituisaun sosiál sira-ne'ebé eziste iha munisípiu Bobonaro. Imajen Tatoli/Sérgio da Cruz.

BOBONARO, 11 juñu 2024 (TATOLI)— Ministeriu Solidariedade Sosiál (MSSI), tersa ne’e halo atividade diseminasaun dekretu lei númeru 25/2017 kona-ba rejime jurídiku instituisaun solidariedade sosiál ba instituisaun no organizasaun sosiál hirak-ne’ebé eziste iha munisípiu Bobonaro.

Diretór Nasionál Kooperasaun no Parseria hosi Ministériu Solidariedade Sosiál no Inkluzaun, Adão Jorge Baptista Pinto, esplika, diseminasaun ne’e oinsá  atu partilla informasaun lala’ok dekretu lei ne’e ba entidade hotu liu-liu ba organizasaun sira-ne’ebé maka hala’o sira-nia servisu ligadu ho asuntu solidariedade sosiál.

Notísia relevante: MSSI aprova ona konteúdu PON Lei Protesaun ba Labarik

“Liuhusi divulgasaun ida-ne’e fó biban ba sira-ne’ebé iha interese, atu aplika sai hanesan instituisaun solidariedade sosiál ne’ebé maka atu servisu hodi tau-matan ba grupu vulnerável sira tempu ita foku halo iha munisípiu sira atu iha kolaborasaun di’ak entre entidade sira ho autoridade lokál sira atu asegura ninia efikasia ba implementasaun programa sira-ne’e,” nia ko’alia iha salaun enkontru administrasaun munisipál Bobonaro.

Diretór Sentru Solidariedade Sosiál no Inkluzaun Munisípiu Bobonaro, Acacio Goncalves, reforsa lala’ok husi dekretu lei ne’e atu regulariza entidade sira oinsá bele hetan utilidade sosiál signifika hetan atribuisaun rekoñesimentu husi estadu hodi hala’o servisu hodi fó protesaun sosiál ba sidadaun sira hotu.

Nia fundamenta, liuhusi atividade ne’e mós oinsá atu uniformiza prosedimentu legál sira-ne’ebé mak iha, tanba iha institutuisaun no organizasaun balu ne’ebé hari husi madre sira hetan apoia husi ministeriu seluk.

“Lei ne’e la’o tiha iha 2017, maibé foin primeira-vez sosializa iha ita-nia munisípiu, ne’ebé husu ita hotu atu aproveita didi’ak, atu nune’e aban bainrua halo proposta ruma karik ita bele haree tuir lala’ok husi lei ne’ebé iha,” nia katak.

Sekretáriu Autoridade Munisípiu Bobonaro, Domingos da Costa, agradese no konsidera atividade importante tebes ba entidade no organizasaun sira ne’ebé servisu foka ba asuntu sosiál.

“Ita-nia lei ne’e aprova iha 2017, maibé agora mak foin halo sosializasaun, ne’e katak durante ne’e ita hala’o atividade hotu-hotu, seidauk tuir lei ne’e, tanba ne’e servisu ne’ebé ita halo seidauk kesi-metin ita, maibé lei ne’e sai ona kesi-metin ita katak ita halo servisu hotu-hotu tuir lei,” nia hateten.

Enkuantu atividade ne’e kontinuasaun husi diseminasaun ne’ebé iha trimestee dahuluk halo ona iha munisípiu Covalima no Aileu, no ba trimestre daruak nian sei kontinua ba munisípiu sira hanesan Ainaro, Liquiçá no seluk tan.

Notísia relevante: Governu aprova dekretu-lei haat hosi MSSI

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!