DILI, 17 novembru 2023 (TATOLI)—Ministra Solidariedade Sosiál no Inkluzaun (MSSI), Verónica das Dores, aprova ona konteúdu Prosedimentu Operativu Normalizadu (PON), kona-ba jestaun kazu no koordenasaun atu ajuda vítima violénsia doméstika, violénsia seksuál no forma violénsia seluk hasoru feto ho labarik, haktuir iha Lei Protesaun ba Labarik.
Notísia Relevante: PN aprova projetu-lei protesaun ba labarik iha finál globál
“Agora faze tuir mai ita entrega ba jurídiku sira haree hosi prespetiva legál ninian, antes ita halo lansamentu,” Ministra Verónica hateten liuhosi nota ne’ebé Tatoli asesu, sesta ne’e.
PON sai nu’udar padraun nasionál ba servisu fornese asisténsia ba feto no labarik ne’ebé sai vítima ba violénsia doméstika, violénsia seksuál no forma violénsia sira seluk ho nia objetivu sira mak hanesan;
1.) Atu atualiza informasaun sira iha PON bazeia ba dinámika servisu atuál, liuhosi konsultasaun adekuadu ho parseiru relevante.
2.) Atu haforsa PON nu’udar padraun servisu asisténsia ba vítima.
3’) Atu konsidera vítima nu’udar sentru iha ita-nia asisténsia hotu.
4.) Atu haforsa organizasaun fornesedór servisu no mós servisu na’in sosiál sira-nia koñesementu hodi bele fornese servisu tuir padraun,
5.) Atu aumenta produsaun ba PON.
PON ne’e sai nu’udar jestaun kazu ba protesaun ba labarik no halo revizaun ba dala-tolu ona, no iha ona dokumentu rua hanesan dokumentu versaun kompreensivu no dokumentu versaun simples.
MSSI liuhosi Diresaun Nasionál Inkluzaun no Reinsersaun Komunitaria, servisu hamutuk ho parseiru sira hanesan UNICEF ho programa NABILAN hosi Governu Australia, liuhosi Fundasaun Asia mak elabora PON ida-ne’e.
Entretantu, Konvensaun Internasionál kona-ba labarik, ratifika ona hosi Estadu Timor-Leste dezde tinan 2003 no Lei Protesaun ba Labarik aprova ona hosi Parlamentu Nasionál iha inisiu tinan 2023.
Lei Protesaun ba Labarik ninia na’in mak MSSI, tan ne’e iha mandatu IX Governu Konstitusionál liuhosi lideransa Ministra no Vise-Ministra MSSI nian, hala’o ona esforsu hodi aselera kriasaun prosedura operasionál ida ho mekanizmu balu tan, ne’ebé ajuda Governu liuhosi MSSI atu bele implementa Lei ne’e iha tempu badak.
Notísia Relevante: Sensibilizasaun projetu-lei protesaun ba labarik sei hein Governu foun
Jornalista : Osória Marques
Editór : Cancio Ximenes
