iklan

HEADLINE, KAPITÁL

Servisu Balkaun Úniku kontinua fali iha tinan oin

Servisu Balkaun Úniku kontinua fali iha tinan oin

Diretór Jerál Dezentralizasun no Governu Lokál husi MAE, António Agusto Guterres. Imajen Tatoli/Arminda Fonseca

DILI, 11 juñu 2024 (TATOLI)—Diretór Jerál Desentralizasaun Governu Lokál, António Agusto Guterres, hateten, portál Balkaun Úniku ne’ebé foin lalais Governu lansa sei kontinua atualiza iha tinan oin.

“Portál Balkaun Úniku ne’ebé foin lalais ita lansa iha Manatuto atu promove prosesu desentralizasaun no prestasaun servisu iha nível lokál, ninia progresu sei kontinua fali iha tinan oin tanba tenke iha orsamentu ba instala. Osan ne’e tinan-2025 mak foin kontinua ba munisípiu sira seluk,” Diretór informa ba Agência Tatoli, iha ninia knaar fatin, Ministériu Administrasaun Estatál (MAE), Colmera, tersa ne’e.

Hafoin lansa portál, dadus husi munisípiu Liquiçá no Manatuto, enkuantu seluk sei atualiza iha tinan oin.

Notisia relevante : PM Xanana lansa edifisiu no portal Balkaun Úniku iha Manatuto

Balkaun Úniku hanesan projetu husi parseria entre Programa Nasaun Unida ba Dezenvolvimentu (PNUD) no MAE hanesan inovasaun importante ida husi Governu atu lori servisu públiku besik sidadaun sira. Nune’e iha loron 04 maiu, Primeiru Ministru, Kay Rala Xanana Gusmão, halo lansamentu ba edifísiu no portál Balkaun Úniku.

“Balkaun Úniku kapas, dijitalizasaun ne’e kapas, maibé laós atu fasilita imi-nia servisu atu imi tuur de’it lae, ne’e hodi imi servisu atu hare’e buat ne’e la’o oinsá. Hau fó parabéns ba imi,” nia dehan.

Balkaun Úniku ema hotu bele asesu servisu sira seluk ne’ebé la hanesan, poupa tempu no osan, no inklui administrasaun Governu, saúde, edukasaun, bee no saneamentu, mobilidade urbana, konservasaun ambientál.

Portál ne’e bele fasilita informasaun kona-ba servisu munisípiu no notariadu sira hanesan prosedimentu administrativu, taxa, nune’e mós kanál ba sidadaun sira atu ativamente fó sujestaun kona-ba oinsá atu hadi’a prestasaun servisu.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!