MANATUTO, 04 maiu 2024 (TATOLI)– Primeiru Ministru, Kay Rala Xanana Gusmão dader ne’e halo ona lansamentu ba edifisiu no portal Balkaun Úniku iha Munisípiu Manatuto atu promove prosesu desentralizasaun no prestasaun servisu iha nivel lokál.
Balkaun Úniku hanesan rezultadu projetu parseria entre Programa Nasoins-Unidas ba Dezenvolvimentu (PNUD) no Ministériu Administrasaun Estatal (MAE) hanesan inovasaun importante ida husi Governu atu lori servisu públiku hodi besik ba sidadaun sira.
Primeiru Ministru, Kay Rala Xanana Gusmão rekoñese lansamentu ida ne’e importante tebes tanba kria ona baze dadus ba desentralizasaun governu lokal.
“Balkaun úniku kapaas, digitalizasaun ne’e kapas, maibé laos atu fasilita imi nia servisu atu imi tur deit, lae ne’e hodi imi servisu atu hare’e buat nee lao oinsa. Hau fo parabéns imi,” esplika Xanana Gusmão iha edifísiu Balaun Úniku Manatuto Villa, sábadu ne’e.
Maske nune’e, Xefe Governu ne’e hatete ida ne’e signifika hodi hakat ba oin maibé foin hahu, nune’e husu ba ema hotu servi povu tuir nia funsaun no responsabilidade.
Ministru Administrasaun Estatal, Tomas Cabral hateten lansamentu edifisiu Balkaun Úniku ne’e laos deit ba Manatuto ho apoiu PNUD no MAE, maibé iha loron hanesan ba mós Munisíipiu Liquiça ne’ebé ho apoiu 100% husi PNUD.
Balkaun Úniku ema hotu bele asesu servisu sira seluk ne’ebé la hanesan, poupa tempu no osan, no inklui administrasaun governu, saúde, edukasaun, bee no saneamentu, mobilidade urbana, konservasaun ambientál.
“Iha Dili ita lansa ona no hetan apoiu husi Uniaun Europeia inklui Portugal, tuir mai ita sei lansa tan iha Baucau no Manufahi. Munisipiu hitu seluk sei iha hotu iha tinan ida ne’e,” Nia deklara.
Iha balkaun úniku ne’e Ministériu Justisa mak parseiru importante ida iha esforsu ne’e. Nune’e, iha faze dahuluk, ita sei asesu ba servisu sira husi Diresaun Jeral Servisu Rejistru no Notariadu hanesan Billete Identidade, Rejistru Kriminál, Hasai passaporte inklui Sistema informasaun Resensiamentu Eleitoral Biometriku – STRE, sira ne’e hotu mos bele asesu liu husi portal portal.municipio.gov.tl/balkaun-uniku/.
Balkaun Úniku mos bele fasilita informasaun kona-ba servisu munisipiu nian no notariadu sira hanesan, prosedimentu administrativu, taxa, nune’e mos kanál ba sidadaun sira atu ativamente fó sujestaun kona-ba oinsá atu hadi’a prestasaun servisu. Edifisiu Balkaun Úniku iha dezeñu ida ne’ebé amigável, modernu, konfortável no asesivel.
Prezidente Autoridade Munisípal Manatuti, Lúis Fernandes mós hato’o agradese ba governu tanba hili ona Munisipiu Manatuto hodi inisia balkaun úniku fasilita komunikade Manatuto iha prosesu trata dokumentu pessoal.
“Hodi povu Manatuto oan tomak sente onradu Governu hili Manatuto primeira lansamentu reprezenta Munisípiu sira seluk. Ita sei sai testamuña ba ida ne’e nune’e bainhira sidadaun sira atu trata dokumentu ba oin sei la gasta trmpu barak tan,” Nia esplika.
Adjunta Reprezentante PNUD, Adeline Carrier dehan ho politika Balkaun Uniku nian, fiar katak hadi’a efisiénsia no efetividade ba servisu públiku, liu husi reduz kustu ba transaksaun no birokrasia.
“Inisiativa ne’e sei kombate korupsaun no asegura katak ema hotu simu servisu kualidade ne’ebé sira merese,” Nia haktuir.
Adeline Carrier konkorda inisiativa ne’e hanesan komitmentu konkretu atu promove governasaun di’ak liu husi estratéjia dekentralizasaun ne’ebé adapta ho nesesidade populasaun.
Aliende fasilita informasaun sira iha edifisiu Balkaun Úniku, informasaun sira mos bele hetan ho gratuita iha portal balkaun úniku ne’ebé konverte ona ho portal munisípal nian ho dadus sira liga ho aréa sira hanesan dadus populasaun, agrikultura, rekursu minerais, fasilidade saude, protesaun sosial, edukasun, lingua no relijiaun.
Lansamentu Balkau Úniku ne’e hetan partisipasaun husi membru governu sira, diplomata, autoridade munisipiu Baucau, Manufahi inklui komunidade iha Manatuto.
Jornalista : Cidalia Fátima
Editor : Armandina Moniz
