iklan

SAÚDE

Ai-moruk “stock out” iha Hospitál Nasionál Guido Valadares 11%

Ai-moruk “stock out” iha Hospitál Nasionál Guido Valadares 11%

Aimoruk sira iha armazen Servisu Autonomu Medikamentu no Ekipamentu Saúde (SAMES) iha Kampu Alor Dili. Imajen Tatoli/Francisco Sony

DILI, 12 juñu 2024 (TATOLI)–Diretór Servisu Apoiu Diagnostiku no Terapeutika iha Hospitál Nasionál Guido Valadares, Vidal de Jesus Lopes, hateten ai-moruk stock out iha Hospitál Nasionál Guido Valadares ne’e iha 11% korresponde item 53 husi totál ai-moruk item 405 ne’ebé kompostu husi ai-moruk vital, esensiál no nesesariu.

Nia hateten, Hospitál Nasionál Guido Valadares (HNGV) mós rejista ai-moruk konsumavel ne’ebé stock out hamutuk 13%, ne’ebé korresponde ba item 58 husi totál item konsumavel item 440 iha armazen HNGV nian.

“Husi totál ai-moruk konsumavel ne’ebé stock out ne’e mak hanesan luvas, máskara, seringa, chateter, Laringeal mask airway no seluk tan. Agora ne’e daudauk, hakarak apreveita okaziaun ida-ne’e atu informa katak ita-nia ai-moruk stock out agora ne’e iha 11%. Iha fulan kotuk ne’e 14% no agora tun ba 11%. Signifika stock ne’e ready hela, tanba stock konsumavel 13%,”  Diretór Servisu Apoiu Diagnostiku no Terapeutika ne’e hateten ba jornalista sira iha Hospitál Nasionál Guido Valadares, Bidau, kuarta ne’e.

Ai-moruk stock out ne’e maioria hanesan ai-moruk Naps/bius kategoria narkotika atu ema halo sirurjia no haakalma pasiente ka redús moras.

Diretór ne’e esplika, prosesu ba kompra ai-moruk ne’e defísil uitoan, tanba empreza ka farmasia privada sira labele halo kompra, tanba ema bele utiliza ba buat seluk, entaun Institutu Nasionál Farmasia no Produtu Medikamentu (INFPM) bele halo prosesu akizisaun.

INFPM kontinua fornese ai-moruk ba HNGV hodi bele garante stock ai-moruk atu responde ba nesesidade pasiente sira-nian no kazu nesesariu bele halo kompra emerjénsia.

“Úniku instituisaun ne’ebé mak hatama ka importa mak INFPM de’it. Farmasia privadu rai-laran laiha autorizasaun ne’ebé atu hatama sasán sira klasifikasaun narkotika, tanba utiliza sala fali buat seluk. Lei regula insituisasaun atu hatama mak INFPM,” nia hateten.

Nia hateten, ai-moruk agora iha hela dalan atu tama, nune’e bele redús no rezolve problema sira-ne’e fazeadamente.

Nia garante, públiku sei kontinua fó fiar hodi halo tratamentu iha HNGV, tanba konfiansa povu nian mai ospital nasionál nafatin ne’e bazeia ba faktu loro-loron nian, ne’ebé pasiente sira mai barak tebes.

Nia rekoñese, iha bu’at balun ne’ebé presiza hadi’a hodi bele fó atendimentu kualidade no dignu ba pasiente sira ne’ebé moras, parte rekursu umanu hodi bele halo atendimentu profisionál no responsabilidade.

“Konfiansa iha nafatin, ospital nasionál ne’e ita-nia uma boot, ita-nia ema, familia inklui ita mai hotu iha ne’e. Setór saúde la politiza buat ida. Ami hato’o bu’at ida-ne’ebé loos no rekoñese sala,” nia dehan.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!