iklan

COVALIMA, HEADLINE

Covalima seidauk ezekuta verba iha kapitál menór no dezenvolvimentu

Covalima seidauk ezekuta verba iha kapitál menór no dezenvolvimentu

Komisaun C ho F Parlamentu Nasionál halo enkontru ho Prezidente Autoridade Covalima. Foto/Celestina Teles.

COVALIMA, 12 Juñu 2024 (TATOLI) – Komisaun C Parlamentu Nasionál ne’ebé trata asuntu Finansa Públika halo fiskalizasaun ba ezekusaun Orsamentu Jerál Estadu (OJE) 2024 iha munisípiu Covalima no observa katak verba ba kapitál menór no dezenvolvimentu seidauk ezekuta.

Prezidente Komisaun C, Cedelízia Faria dos Santos, dehan prezensa komisaun nian iha Covalima atu haree no rona direta esplikasaun husi Prezidente Autoridade Munisípiu (PAM) Covalima, Miguel Armada Cardoso, ho nia kargu xefia  sira kona-ba implementasaun OJE tinan ne’e.

Deputada ne’e salienta katak alokasaun orsamentu ba Covalima iha tinan ne’e hamutuk millaun $7,3 no to’o ohin loron nia ezekutasaun foin to’o 26% no bainhira inklui ho kompromisu ezekusaun sa’e ba 36%.

“Se la inklui kompromisu nia ezekusaun ki’ik. Triste, ezekusaun OJE iha kapitál menór no dezenvolvimentu seidauk”, Cedelízia dos Santos preokupa hafoin enkontru ho autoridade Covalima, ohin.

Tuir observasaun husi Komisaun C, ezekusaun OJE 2024 iha Covalima ki’ik, tanba atu ezekuta kapitál menór no dezenvolvimentu tenke liuhusi prosesu aprovizionamentu. Komisaun mós nota katak maski ezekusaun orsamentu ne’e ki’ik, enkuantu iha área urbana hasoru problema kona-ba asesu ba estrada rurál no orsamentu ba ensinu rekorente nia ezekusaun zero, maski ema barak hakilar problema iha edukasaun.

“Ami komprende katak PAM foin simu pose iha Marsu no kargu xefia sira iha Fevereiru. Sira promete sei aselera ezekusaun orsamentu”, dehan.

Iha sorin seluk, Diretora Servisu Munisipál ba Finansa, Rosita Freitas, hateten Governu sentrál aloka OJE 2024 ba Covalima millaun $7,3 atu finansia programa 13, subprograma 31, atividade 74, tuir planu asaun anuál husi servisu munisipál 19.

Husi montante ne’e, aloka ba saláriu no vensimentu millaun $2,3 ne’ebé ezekuta ona 22,8%, bens no servisu $846.885 no ezekuta 23,9 % no transferénsia públika millaun $2,6 no ezekuta ona 48%.

“Munisípiu Covalima seidauk ezekuta kapitál menór $166.820 no kapitál dezenvolvimentu $1,350.192. Nia ezekusaun sei iha zero porsentu”, esplika.

Nia salienta alokasaun orsamentu ba postu hitu ho totál $601.706 ne’e ezekuta ona 18,4 % ka ekivale ba 96.468,36.

Diretór Servisu Munisipál ba Aprovizionamentu, Roberto Alvaro Gomes, admite katak autoridade Covalima seidauk ezekuta orsamentu iha kapitál menór no dezenvolvimentu tanba atu implementa projetu presiza liuhusi prosesu aprovizionamentu.

Notísia relevante: Covalima ezekuta ona 20,5% husi OJE tinan ne’e

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!