iklan

HEADLINE, INKLUZAUN SOSIÁL

Embaixadór Finlándia no Ministru Konselleiru Alemaña observa projetu MAC-B iha CNC, I.P

Embaixadór Finlándia no Ministru Konselleiru Alemaña observa projetu MAC-B iha CNC, I.P

Embaixadór Finlándia, Pekka Shonnenhol no Ministru Konselleiru Asuntu Polítiku Repúblika Federál Alemaña, Petter Sonnenhol hamutuk ho ekipa halo enkontru ho Diretór Ezekutivu CNC, I.P, Hugo Maria Fernandes ho kargu xefia sira, iha salaun enkontru CNC, I.P, Balide, kuarta (12/06/2024). Imajen Tatoli/Arminda Fonseca

DILI, 12 juñu 2024 (TATOLI)—Embaixadór Finlándia, Pekka Shonnenhol no Ministru Konselleiru  Asuntu Polítiku Repúblika Federál Alemaña, Petter Sonnenhol, kuarta ne’e, halo vizita ba Centro Nacional Chega, Institutu Públiku (CNC,I.P) hodi observa projetu re-dezenvolvimentu Muzeu Antigu Komarka Balide (MAC-B, sigla portugés), ne’ebé finansia husi Governu Alemaña.

“Ohin ne’e ita hetan vizita ida husi Embaixadór Finlándia no Ministru Konselleiru Alemaña nian. Sira-nia vizita ne’e mai atu haree projetu MAC-B ne’ebé mak Governu Federál Alemaña apoiu ba CNC,I.P kona-ba re-dezenvolvimentu Muzeu Antigu Komarka Balide,” Diretór Ezekutivu CNC, I.P, Hugo Maria Fernandes, informa iha resintu edifísiu, Balide.

Notísia relevante : Governu Alemaña apoia $390.000 ba CNC, I.P hodi hadi’a muzeu antigu Komarka Balide

Governu Federál Alemaña oferese orsamentu ho totál £345.000 ($400.000).

“Re-dezenvolvimentu ba muzeu ne’e rasik konstrusaun muzeu ne’e rasik, agora atu tama fulan ona ita bele hateten 70% tanba badaen sira agora ne’e halo konstrusaun fíziku maibé kontíudu sira ne’e halo iha fatin seluk entaun konstrusaun fíziku ne’e ramata no hamoos hotu ona, kontíudu sira ne’e hein lori mai monta de’it, tuir planu sei inaugura iha outubru 2024,” nia akresenta.

Obra ne’e hanesan muzeu modernu dahuluk iha Timor-Leste tanba sei kompleta ho fasilidade bele rona, haree, no seluk tan, ne’ebé kuaze 50-resin ezibisaun ne’e forma ba dijitalizasaun.

Iha vizita ne’e, Emabixadór Finlándia hato’o inisiativa atu kontinua apoiu ba CNC,I.P.

“Sira-nia planu apoiu ne’e foku oinsá mak kontinua dezenvolve muzeu ne’e hodi lori ema barak mai iha ne’e, liu-liu lori estudante sira mai iha ne’e, sira tetu atu fó apoiu mós dezenvolve muzeu hanesan ne’e iha munisípiu sira,” nia dehan.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!