DILI, 12 juñu 2024 (TATOLI)–Diretór Servisu Apoiu Diagnostiku no Terapeutika (SADT) iha Hospitál Nasionál Guido Valadares (HNGV), Vidal de Jesus Lopes, rejeita informasaun públikada iha midia sosial katak labarik sira mate iha Unidade Kuidadu Intensivu (ICU) pediatria tanba ai-moruk vasina laiha ne’e laloos.
Vidal de Jesus Lopes hateten, HNGV halo konfirmasaun ona kona-ba asuntu ne’e ba iha parte departamentu pediatria nian maibé situasaun ne’e la akontese.
“Informasaun ne’ebé espalla iha midia sosial katak ai-moruk laiha liuliu iha sala Unidade Kuidadu Intensivu (ICU) pediatriuku ka labarik nian katak ai-moruk laiha ne’e mak labarik mate ne’e ha’u foin konfirma ho parte departamentu katak informasaun ne’e ne’e laloos,” Diretór SADT, Vidal de Jesus Lopes ba jornalista sira, iha HNGV.
Iha ai-moruk balun laiha ba labarik sira-ne’ebé hetan moras abses iha nia kakorok, maibé iha alternastiva medikamentu hodi bele responde ba pasiente sira-nia moras.
Labarik sira ne’ebé mate ne’e kauza tanba falla respiratória ne’e top referal hanesan kazu sira-ne’ebé transfere husi ospital referensia sira ho kompleksidade mak hanesan problema fuan ka fuan iha má formasaun.
Iha mos kazu sira seluk hanesan komplikasaun ba moras pneumonia Civil Acut respiratory syndrome no labarik sira-ne’ebé moris mai ho asfixia neonatal ka han nia fo’er.
“Entaun, moris mai ho komplikasaun sira seluk ne’ebé ida mak kauza hosi mate ka labarik sira moris mai ho kilo kiik, ida-ne’e kauza mortalidade ba labarik sira,” nia dehan.
Jornalista : Jesuína Xavier
Editór : Cancio Ximenes
