iklan

EKONOMIA, HEADLINE

Komunidade iha Bocolelo oferese rai ba MAPPF no PNTL konstrui postu vijilánsia

Komunidade iha Bocolelo oferese rai ba MAPPF no PNTL konstrui postu vijilánsia

Foto ilustrasaun husi Google.

DILI, 12 Juñu 2024 (TATOLI) – Populasaun iha suku Bocolelo, postu administrativu Laulara, munisípiu Aileu, disponibiliza gratuitamente terrenu ba Ministériu Agrikultura, Pekuária, Peska no Floresta (MAPPF) no ba Polísia Nasionál Timor-Leste (PNTL) atu konstrui postu vijilánsia.

Diretór Nasionál Floresta, Guilhermino Moniz, informa katak rai ne’ebé oferese ne’e instituisaun rua ne’e sei harii idaidak nia postu hodi ajuda malu halo kontrolu ba atividade ilegál ne’ebé halo husi komunidade.

“Ami realiza ona enkontru ida hamutuk ho Prezidente Autoridade Munisípiu Aileu no Diretór Servisu Agrikultura Aileu hodi ko’alia kona-ba prosesu konstrusaun postu ba guarda florestál nian”, Guilhermino Moniz dehan iha Colmera, ohin.

Estabelesimentu postu ne’e atu halo kontrolu ba iha área floresta nian, liuliu ba ai no animál sira, tanba komunidade seidauk iha konxiénsia atu kuidadu rikusoin sira ne’ebé moris iha ai-laran.

“Planu konstrusaun sentru intregradu ne’e kuandu realiza ona bele asegura sasán sira ne’e ho di’ak liután. Fatin ne’e sira identifika ona”, dirijente ne’e asegura.

Nia esplika katak sentru ba guarda florestál nian ne’e atu asegura ai sira ne’ebé komunidade sira tesi no ba animál sira ne’ebé komunidade tula hanesan karau, bibi, manu no balada fuik sira ne’ebé ema kasa. Ba postu polisiál nian atu reforsa serbisu MAPPF nian hodi proteje ema labele halo problema ho guarda florestál sira bainhira hasoru komunidade sira halo atividade ilegál.

Ba postu ne’e, parte Floresta prepara ona planta no kadernu enkargu (BoQ) ho nia orsamentu sira kuaze rihun $25 hodi konstrui kuarta ida, sala ida, inklui varanda no armazein ida.

“Prosesu hotu hein de’it desizaun aprovizionamentu ba konkursu públiku. Kuandu iha ona empreza balun maka manán, bele hahú ona”, espera.

Notísia relevante: MAPPF hakarak harii postu revista iha Casnafar ho osan rihun $25-resin

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!