iklan

COVALIMA, HEADLINE

Pesoál apoia suku presiza tuir formasaun iha área administrasaun

Pesoál apoia suku presiza tuir formasaun iha área administrasaun

Xefe suku lima ho nia estrutura foto hamutuk ho Administradór Postu Suai. Foto/Celestina Teles.

COVALIMA, 12 Juñu 2024 (TATOLI) – Administradór postu administrativu Suai, Idelfonso Maria Amaral, sujere atu disponibiliza formasaun iha área administrasaun ba pesoál apoia suku, nune’e sira bele hala’o knaar ho di’ak.

Idelfonso Amaral dehan formasaun ba pesoál sira ne’e foka liu ba sira-nia papel, lideransa no oinsá atu prienxe livru 18 kona-ba foti dadus monografia no demografia, rejista karta tama no sai no seluk tan.

Atu realiza formasaun, administradór ne’e sei submete karta ba Prezidente Autoridade munisípiu (PAM) Covalima, Miguel Armada Cardoso, tanba funsionáriu foun apoia suku ne’e seidauk tuir formasaun kona-ba administrasaun, maibé foin tuir de’it formasaun kona-ba implementasaun Lei Podér Lokál no Desentralizasaun Administrativa.

“Formasaun hanesan parte ida hodi hasa’e funsionáriu apoia suku sira-nia koñesimentu, nune’e sira bele komprende di’ak liu prosesu administrasaun iha suku hodi halo atendimentu ba komunidade ho di’ak”, nia dehan.

Iha sorin seluk, xefe suku Beco, Arlindo Bernardino Lemos, konkorda ho administradór nia hanoin atu fó formasaun ba pesoál apoia suku hodi halo atendimentu adekuadu ba populasaun sira.

“Funsionáriu apoia suku seidauk tuir formasaun, nune’e balun ladauk hatene loloos sira-nia papél, lala’ok administrasaun ne’ebé atu hala’o iha suku”, nia admite.

Pesoál apoia suku iha Covalima ne’ebé foin rekruta hamutuk 120 no destaka iha suku 30 iha postu hitu ne’ebé serbisu iha área sira hanesan ofisiál administrasaun suku, ofisiál finansa suku, sekretáriu administrasaun suku no ofisiál ba asuntu sosiál.

Notísia relevante: SMARU simu ona lista kandidatu ne’ebé konkorre vaga ba pesoál apoiu suku

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!