iklan

EDUKASAUN, HEADLINE

TLCE konsidera ME presiza kria kondisaun molok implementa polítika

TLCE konsidera ME presiza kria kondisaun molok implementa polítika

Diretor Ezekutivu TLCE, José Monteiro. Imajen Tatoli/Egas Cristóvão

DILI, 12 juñu 2024 (TATOLI)–Diretór Ezekutivu Timor-Leste Coalition of Education (TLCE), José Monteiro, konsidera, Ministériu Edukasaun (ME) presiza kria kondisaun molok destaka profesór rekrutadu husi programa bolsa kandidatu ba eskola iha munisípiu sira.

“Polítika Ministériu Edukasaun ba kolokasaun profesór foun ne’e normál no tenke la’o nune’e duni. Estadu labele halo tuir ema ida-idak ninia hakarak. Buat ne’ebé Ministériu Edukasaun halo ne’e loos maibé atu loos liu ne’e prepara kondisaun. Entaun, nu’udar Ajente Administrasaun Públika prontu hanorin mak tenke bá, maibé liga filafali ba fatin, han-hemun, saláriu kiik karik, nia oan iha tan karik, depois distánsia dook,” Diretór hateten liuhusi programa entrevista eskluziva Agência Tatoli, iha estúdiu Farol, kuarta ne’e.

Nia dehan, profesór rekrutadu tenke prontu serví tanba aleinde hanorin, sira mós hanesan Ajente Administrasaun Públika.

“Ha’u ema Lospalos, ha’u bele bá hela iha Aileu, la’ós problema. Maibé ha’u atu di’ak liu ne’e ida-idak nia orijen, se lae profesór foun ne’e haruka fila ba nia orijen, hanesan Bobonaro bá Bobonaro nomós ho munisípiu seluk tau nune’e labele fó prejuízu ba despeza Estadu nian, ida-ne’e presiza despeza, se hakarak ideál mak tenke iha ida-idak nia munisípiu,” nia sujere.

Notísia relevante : TLCE identifika maioria ESTV menus fasilidade prátika

Diretór ne’e nota, iha buat barak ne’ebé sei falta hanesan saladeaula menus, kalen eskola kuak hela no uma ba profesór.

“Agora hili ida-ne’ebé halo uma ba profesór ka hadi’a saladeaula, presiza tau prioridade ba ida. Ministériu Edukasaun labele aumenta tan problema. Entaun, husu ba Ministériu Edukasaun karik hakarak rona, lakohi rona laiha buat ida, maibé mak ne’e husik profesór husi Liquiçá ba nia orijen, nune’e nia bele halo sustentabilidade ba nia moris no prepara-an ba hanorin,” nia rekomenda.

Nia husu ba ME, dahuluk presiza uma própriu ba profesór no daruak mak transporte, tanba bainhir akondisaun hirak ne’e iha maka ema sei halo nia funsaun ho di’ak.

“Ezemplu kiik, tempu Indonézia nian iha rumah dinas para fasil, nune’e nia bele bá hela ho nia família tomak. Tanba ne’e presiza kria kondisaun tanba kondisaun di’ak mak ema bele hanorin ho di’ak. Nune’e bele kontribui di’ak ba dezenvolvimentu edukasaun,” nia reforsa.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!