COVALIMA, 13 Juñu 2024 (TATOLI) – Eskola Sekundária Jerál Suai presiza profesór atu hanorin dixiplina lima, informa diretór eskola, Fernando Ferreira.
Dirijente ne’e dehan Ministériu Edukasaun halo ona kolokasaun ba profesór ne’ebé liu bolsa rekrutamentu, maibé eskola nafatin presiza manorin ba dixiplina Malaiu, Temas Literatura, Tetun, Portugés no Inglés.
“Eskola sei falta ba profesór. [Tanba ne’e] inan-aman estudante iha inisiativa rasik kria enkontru hodi kontribui osan kada estudante $1.50 hodi ajuda eskola, nune’e oinsá mak dixiplina bele la’o hanesan normál hodi hein rekrutamentu husi Ministériu Edukasaun”, Fernando Ferreira adianta, ohin.
Diretór ne’e salienta katak liuhusi osan kontribuisaun inan-aman sira, eskola kontrata tan profesór 17 hodi bele ajuda hanorin, tanba inan-aman iha devér atu tulun eskola nune’e prosesu ensinu-aprendizajen bele la’o ho di’ak hodi hein rekrutamentu foun husi Ministériu Edukasaun.
Atu responde ba problema falta profesór ne’e, Ministériu Edukasaun mós loke tan ona vaga bolsa rekrutamentu ba profesór sira atu kompete, nune’e bele sai manorin di’ak iha eskola.
Aleinde falta profesór, Fernando Ferreira informa katak eskola mós presiza tan kadeira, no meza 300-resin, materiál didátiku ba dixiplina Siénsia Teknólojia, Matemátika, Biolojia no sira seluk. Eskola submete ona pedidu ba Ministeriu Edukasaun kona-ba kestaun ne’e.
Eskola Sekundária Públiku Suai iha alunu hamutuk 2.531 ho totál profesór 64, husi númeru ne’e na’in-17 hanorin tanba kontribuisaun husi inan-aman estudante.
Diretora Servisu Edukasaun Covalima, Elda de Fátima, admite katak la’ós Eskola Sekundária Jerál Públiku Suai mesak mak laiha profesór, maibé iha mós eskola sekundária paralela Selele no ensinu báziku sira.
“Daudaun ne’e, ekipa husi nasionál simu ona dokumentu husi profesór sira ne’ebé atu tuir teste bolsa kandidatu hamutuk 200-resin”, realsa.
Antes ne’e, Servisu Edukasaun Covalima koloka ona profesór na’in-11 ba eskola bázika sentrál no filiál.
Notísia relevante: Profesór 36 iha Eskola Sekundária Jerál Suai termina kontratu
Jornalista: Celestina Teles
Editora: Maria Auxiliadora
