iklan

HEADLINE, POLÍTIKA

Florindo da Costa asume knaar nu’udar Diretór-Jerál SEKOMS

Florindo da Costa asume knaar nu’udar Diretór-Jerál SEKOMS

Sekretáriu Estadu Komunikasaun Sosiál, Expedito Dias Ximenes. Imajen Tatoli/Francisco Sony

DILI, 13 Juñu 2024 (TATOLI) – Sekretaria Estadu Komunikasaun Sosiál (SEKOMS) organiza serimónia entrega serbisu husi Diretór-Jerál SEKOMS sesante, Ponciano da Cruz Leite, ba diretór-jerál foun, Florindo da Costa.

Sekretáriu Estadu Komunikasaun Sosiál, Expedito Dias Ximenes, agradese ba Komisaun Funsaun Públiku tanba iha tempu badak tebes bele fó resposta ba pedidu ne’ebé SEKOMS hato’o hodi husu figura foun ruma atu asume fali knaar nu’udar diretór-jerál iha instituisaun ne’e, tanba dirijente sesante husu rezignasaun.

“Apresia serbisu Komisaun Funsaun Públika [KFP] nian ne’ebé lidera husi Komisáriu José Telo, tanba nia konsidera ami-nia pedidu hodi responde iha tempu badak figura di’ak ida mai ami, nune’e ohin bele realiza serimónia entrega serbisu husi diretór-jerál sesante ba diretór-jerál foun”, Expedito Dias hato’o iha ámbitu serimónia ne’ebé realiza iha sala konferénsia Prezidénsia Konsellu Mimistru, iha Palásiu Governu.

Sekretáriu Estadu dehan nia la dúvida ho figura foun ne’ebé KFP nomeia ba SEKOMS, tanba nia koñese di’ak tebes diretór atuál ne’e. “Nia ema ida iha esperiénsia boot iha área administrasaun públika, tanba ne’e bele garante katak nomeasaun ida ne’e sei aselera serbisu iha SEKOMS nia laran”, nia espera.

Governante ne’e hatutan katak nomeasaun kargu sira hanesan ne’e ba ema ida la’ós oportunidade, maibé nu’udar responsabilidade. Tanba ne’e, husi mandatu ne’ebé diretór atuál sei asume ne’e presiza liu maka prestasaun serbisu sira ho di’ak liu hodi fó susesu ba instituisaun, liuliu iha área komunikasaun sosiál hodi apoia mós dezenvolvimentu mídia sira iha país.

Sekretáriu Estadu ne’e mós agradese ba dedikasaun ne’ebé diretór sesante halo durante fulan 10-resin no progresu ne’ebé nia halo ona sai nafatin bukae ida iha SEKOMS, nune’e bele motiva ema hotu atu serbisu.

“Agradese ba diretór Ponciano ne’ebé fó ona matenek ne’ebé nia iha hodi tulun serbisu administrasaun nian hodi lori progresu iha SEKOMS. Karik nia la husu rezignasaun, oras ne’e nia sei kontinua serbisu ho ami. Tanba kestaun seluk ne’ebé nia labele hateten hodi hato’o de’it pedidu rezignasaun mai SEKOMS”, realsa.

Nune’e mós Komisáriu KFP, José Telo Cristovão, dehan natureza ida kargu ne’e la pertense ba ema ida. Iha sistema ka lei KFP nian iha buat rua maka presiza tau iha konsiderasaun, ida maka nomeasaun no seluk mak selesaun pur méritu. “Agora, kona-ba selesaun ne’e nia valór ba tinan haat no nomeasaun de’it ninia valor ba fulan neen”, esplika.

Komisáriu José Telo husu ba diretór foun atu serbisu ho responsabilidade, tanba bainhira sai ona líder topu iha KFP tenke hatudu mós iha SEKOMS ho saida maka hatudu ona iha tinan barak nia laran nu’udar ema profisionál.

Diretor-Jerál foun SEKOMS, Florindo da Costa. Foto/Gabinete SEKOMS.

“Ami delega Florindo da Costa husi KFP, eis-diretór-jerál iha Ministériu Negósiu Estranjeiru, tanba ami haree ninia background sira. Ne’e duni, ami husu ba ekipa hotu atu serbisu hamutuk ho nia hodi lori susesu ba SEKOMS”, sujere.

Antigu Diretór-Jerál SEKOMS, Ponciano da Cruz Leite, hato’o agradese ba Sekretáriu Estadu tanba fiar ne’ebé atribui ona ba nia hodi asume knaar iha SEKOMS mezmu hasoru tranzisaun ida ne’ebé ladún konfortavel, maibé ho lideransa SEKOMS nian sempre fó orientasaun no motivasaun atu mákina Estadu tenke kontinua funsiona.

“Ha’u hato’o ben-vindu ba Diretór-Jerál Florindo da Costa atu kontinua ezerse serbisu iha fatin ida ne’e. Tenke halo esforsu hodi buka adapta aan ho ambiente serbisu ne’ebé foun hodi ezekuta orientasaun husi Sekretáriu Estadu”, nia fó hanoin.

Iha sorin seluk, diretór-jerál foun agradese mós ba SEKOMS tanba bele fó konfiansa ida ne’e ba nia atu hatutan fali serbisu ne’ebé dirijente tuan halo ona. Nia husu mós ba ekipa hotu iha SEKOMS atu hamutuk ho nia tau hanoin ida de’it, koopera hodi lori progresu ba área ida ne’e.

“Ha’u presiza tebes imi hotu nia tulun, tanba ha’u la’ós ema ida perfeitu. Ha’u mai husi fatin ida tanba hakarak aprende barak. Ne’e duni, ha’u fiar katak iha fatin foun ida ne’e ita hotu bele tulun malu hodi atinje meta ne’ebé iha”, nia solisita.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!