iklan

POLÍTIKA

Governu sei submete kandidatu úniku komisáriu CAC ba PN

Governu sei submete kandidatu úniku komisáriu CAC ba PN

Rui Pereira dos Santos. Imajen Tatoli/Rafy Belo

DILI, 13 juñu 2024 (TATOLI)—Governu sei submete kandidatu úniku komisáriu Komisaun Anti-Korrupsaun (CAC, siglá portugés), Rui Perreira dos Santos, ba Parlamentu Nasionál (PN) atu bele ajenda ba iha plenária hodi halo eleisaun.

Notísia Relevante: Governu propoin Rui Pereira dos Santos ba asume kargu Komisáriu CAC

Sekretáriu Estadu Komunikasaun Sosiál (SEKOMS), Expedito Dias Ximenes, hateten ohin iha reuniaun lidér bankada parlamentár ne’e, nia-parte hato’o kona-ba Governu liuhusi reuniaun Konsellu Ministru (KM) iha 12 juñu tinan ne’e nomeia ona Rui Perreira dos Santos sai nu’udar kandidatu úniku ba Komisáriu CAC.

Sekretáriu Estadu Komunikasaun Sosiál, Expedito Dias Ximenes. Imajen Tatoli/Francisco Sony

“Ha’u hato’o, la kle’ur tan, orsida ou aban sei lori mai iha Parlamentu Nasionál no husi Parlamentu husu, se bele Governu haruka lalais mai iha Parlamentu iha tempu badak, hodi nune’e sira bele halo ajenda iha semana oin,” Sekretáriu Estadu Komunikasaun Sosiál ne’e hateten ba jornalista sira hafoin partisipa reuniaun lidér bankada iha sala konferénsia Parlamentu, kinta ne’e.

Reuniaun lidér bankada ne’e prezide direta husi Prezidente Parlamentu Nasionál, Maria Fernanda Lay, no parte Governu reprezenta husi SEKOMS, tanba Vise Ministru asuntu Parlamentár, Adérito Hugo da Costa, iha hela serbisu seluk iha munisípiu.

Sekretária Meza PN, Virgínia Ana Belo, hateten, ohin, SEKOMS informa de’it kona-ba KM aprova ona kandidatu komisáriu CAC, maibé karta seidauk to’o PN, entaun seidauk tau ba ajenda ba eleisaun.

Hein katak, iha loron ohin ne’e ka aban Governu bele submete mai, entaun bele tau ajenda ona tanba CAC laiha nia lideransa másimu kle’ur ona.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!