iklan

NASIONÁL, HEADLINE

Ró tula kabu submarinu husi Fransa tama ona tasi Timor

Ró tula kabu submarinu husi Fransa tama ona tasi Timor

Ministru Transporte no Komunikasaun, Miguel Marques Gonçalves Manetelu. Imajen Tatoli/Egas Cristóvão

DILI, 13 juñu 2024 (TATOLI)—Ministru Transporte no Komunikasaun, Miguel Marques Gonçalves Manetelu, informa, ró ne’ebé tula kabu submarinu fibra ótika husi Fransa tama ona tasi Timor.

“Ró iha ona fronteira entre Austrália no Timor-Leste no tuir planu ró ne’e sedu liu sei to’o iha loron 20 juñu no tarde liu loron 21 juñu 2024,” Ministru hateten iha Timor Plaza, Dili, kinta ne’e.

Bainhira ró ne’e to’o mai, Governu sei asina repetidór ualu ne’ebé foin lalais Konsellu Ministru deside sei tau luta-na’in sira-nia naran.

“Serimónia  ne’e Primeiru Ministru mak sei sertifika no asina repetidores tau ita-nia martír na’in-ualu nia naran mak hanesan Maria Udu Bele ‘Maria Tapó’, Rosa Bonaparte Soares ‘Muki’, Dulce Maria da Cruz ‘We-we’, Fernando de Araújo ‘Lasama’, Agustinho do Espírito Santo, José da Silva, Venâncio Ramos Amaral Ferraz no Dinis Carvalho da silva ‘Nelo Kadomi Timor’,” nia akresenta.

Notísia relevante : Empreza entrega ona obra CLS kabu fibra ótika iha Bebonuk ba Governu

Bainhira kabu ne’e dada husi tasi okos, la’ós hanaran torre maibé repetidór (access point), katak fiu dada husi tasi okos kada kilómetru 100, repetidór ne’e mak atu hadi’a rede fibra ótika husi tasi okos ho distánsia dook dalaruma tun repetidór ne’e mak sei hadi’a rede atu transmite fali ba repetitór seluk, ikus mai tama iha cable landing station (CLS) iha Bebonuk.

Serimónia repetidór ne’e hotu iha loron 23 ka 24 juñu 2024 Governu sei halo lansamentu ró tula kabu ne’e dada bá Austrália no iha loron 01 agostu 2024 kabu ne’e hahú konekta ba fibra ótika husi Austrália.

“Na’in ba fibra otika husi Austrália ne’e hanaran ‘Vocus’, ne’ebé Timor-Leste sei simu ka konekta ba kabu submarinu ne’ebé dada husi Portland atu bá Darwin. Ita konekta entre rua ne’e nia klaran, maibé ita presiza fulan-rua ka tolu atu koko, ne’ebé faze koko ne’e mak fulan-tolu, signifika ramata iha novembru 2024 kabu ne’e bele utiliza ona,” nia tenik.

Molok ró ne’e tama mai daudaun , parte Ministériu Agrikultura Peska Pekuaária no Floresta liuhusi Diresaun Jerál Peska nian hamoos hela tasi atu haree dalan, liu-liu haree peskadór ilegál sira karik tau hela rumpon tenke hasai.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!