Tempu bailoro, komunidade Mali-lait difisil asesu bee-moos
BOBONARO, 12 juñu 2024 (TATOLI)-Tinan – Iha tempu bailoro naruk komunidade sira iha suku Mali-lait, postu administrativu Bobonaro, munisípiu Bobonaro sempre enfrenta problema difisil atu asesu bee-moos hodi utiliza ba nesesidade bázika no nesesidade sanitária.
Xefe suku Mali-lait, Valdermar Maria Vong de Jesus, informa durante ne’e komunidade sira asesu bee husi bee-matan iha suku Tapo, maibé iha tempu bailoro labele fornese ba uma idak-idak tanba debitu bee menus.
Problema ne’e kuaze akontese iha aldeia tolu ne’ebé pertense ba suku Mali-lait hanesan; Tai-Mea, Malilu no Mali-lait.
Notísia relevante: Abitante Taimea Malilait sosa bee-moos kada bidón $2,50
“Iha tempu bailoro susar tebes ba ha’u-nia komunidade sira atu asesu bee-moos, tanba tempu bailoro naruk bee menus, bee ne’e la mai, komunidade sira tenke sosa, balu la’o distánsia kilómetru ida ba to’o bee-matan mak foin hetan bee,” nia informa ba Jornalista sira iha suku Mali-lait, kuarta ne’e.
Xefe aldeia Mali-lait, Antonio Godinho, reforsa problema ne’e fó impaktu ba komunidade sira nia nesesidade bázika, sanitária inklui utiliza ba atividade agrikultura no ortikultuta.
“Ami aldeia Malialit araska duni be, kuandu bee la mai entaun ami sosa de’it, baskulante ida folin maizumenus $60, ida difikulta mai ami,,” nia tenik.
Líder lokál ne’e rekomenda ba ministériu kompetente atu tau prioridade iha tinan oin hodi rezolve problema ne’e.
Enkuantu suku Mali-lait iha aldeia tolu ho totál 2.000 no uma-kain 400-resin.
Notísia relevante: Abitante Lourba sosa bee moos
Jornalista: Sérgio da Cruz
Editór: Evaristo Soares Martins
