BOBONARO, 07 novembru 2023 (TATOLI) – Abitante sira iha aldeia Taimea, suku Malilait, postu administrativu Bobonaro, munisípiu Bobonaro, durante ne’e sosa bee-moos kada bidón ho folin $2,50 hodi responde ba nesesidade kada loron.
Abitante Taimea, Paquito Godinho, haktuir sira deside sosa bee tanba rekrsu bee ne’ebé durante ne’e sira asesu hosi bee-matan suku Tapo nian, distribuisaun paradu dezde 2019.
Ho situasaun ne’e Paquito subliña, iha tempu bailoro naruk abitante iha aldeia ne’e halerik ba bee-moos.
Notísia relevante: Cecilia Rego: “Ami iha Venilale Vila sosa bee bidon ida $1,75”
“Kalan-kalan ami ba buka bee iha bee-matan ne’ebá, tanba agora bee laiha, ha’u rasik de’it sosa bee gasta $100 liu ona tiha ona, ami sosa tanke ida $40, maibé babain ami sósiu de’it, sosa bidón ida $2,50,” nia informa ba Jornalista sira, iha aldeia Taimea, tersa ne’e.
Tuir nia, fornesimentu bee-mos la to’o aldeia Taimea,tánba falta kontrolu hosi operadór sistema sira.
“Bee ne’e ami halibur osan lori ba leten, maibé sai dala-ida ka rua to’o ona, ami-nia torneira tolu ne’e maran hotu, ami husu governu foun, troka tiha ema sira kaer bee ne’e, uluk ema beik sira mak kaer bee ne’e sei estabil, agora ema matenek mak kaer fali ami la hetan bee,” abintante ne’e preokupa.
Nune’e mós Marcelina de Jesus nu’udar abitante, reforsa durante ne’e atu hetan bee-mos masa ida de’it mós obrigadu tenke la’o-ain hosi uma ba bee-matan ho distánsia kilómetru rua-resin.
“Ami sai ba kuru bee ne’e tuku 04:00 dadeer ne’e ba ona, to’o iha-ne’ebá sei hein malu, kuru giliran ita ba ikus dadeer tuku 8:00 ka tuku 09:00 mak fila, ne’e mos lori masa rua-rua de’it, ami sira ba kuru bee ne’e, osan laiha atu sosa iha ema fa’an ne’e. Ema sira iha osan ne’e mak sosa iha tanki ne’e,” nia akresenta.
Marcelina dehan, problema falta bee-mos ne’e difikulta tebes ba sira atu te’in, fase ropa no atu fó hariis oan sira atu ba eskola.
“Ami husu ba nai-ulun sira, favór tau-matan mai ami-nia bee-mos ne’e lai, tanba agora tempu bailoro naruk ne’e bee laiha, tinan-tinan ami sempre lalin bee iha bee-matan la’o dook,” nia rekomenda.
Portantu tuir dadus Abitante iha aldeia Taimea, suku Malilait hamutuk uma-kain 199.
Notísia relevante: Bee-moos sufisiente ba konsumidór Maliana iha tempu bailoro
Jornalista: Sérgio da Cruz
Editór: Evaristo Soares Martins
