DILI, 14 Juñu 2024 (TATOLI) – Funsionáriu kazuál Ministériu Agrikultura, Pekuária, Peska no Floresta (MAPPF) hamutuk 680 la simu saláriu durante fulan lima tanba problema iha dokumentu sira, informa Sekretáriu Estadu Floresta, Fernandino Vieira.
Tanba ne’e, sai preokupasaun ba superiór ministériu nian, tanba funsionáriu kazuál sira ezerse ona sira-nia devér hodi hala’o serbisu operasionál iha baze, maibé to’o agora lahetan direitu salariál.
“Ami na’in-haat hatene di’ak liu funsionáriu kazuál na’in-680 maka seidauk simu saláriu, maibé ami kompromete katak fulan-Juñu ne’e sira bele simu ona sira-nia direitu, tanba tempu kle’ur liu ona”, sekretáriu Estadu adianta iha Caicoli, ohin.
Nia esplika katak saláriu tarde tanba dokumentu funsionáriu nian mak la kompletu no naran balun mós laloos, nune’e foin trata fali. Aleinde ne’e, prosesu iha rekursu umanu ministériu nian ne’e mós adianta maka demora iha payroll atu halo pagamentu.
“Ha’u rasik sente ladún kontente tanba fulan lima ona ita-nia kazuál sira seidauk simu de’it sira-nia saláriu. Ami hotu iha ministériu ne’e preokupa”, nia salienta.
Governante ne’e husu nafatin ba funsionáriu kazuál 680, liuliu korpu guarda florestál hamutuk 304 ne’ebé destaka iha munisípiu sira atu hala’o nafatin knaar hodi tau-matan ba área protejida sira atu komunidade labele hala’o atividade ilegál hodi tesi ai, sunu rai no estraga sasán sira ne’ebé protejida.
Iha sorin seluk, Diretór Rekursu Umanu MAPPF, Hipólito da Costa, informa katak problema adiantamentu ba prosesu pagamentu saláriu kazuál sira ne’e foin maka finaliza iha inisiu fulan-Maiu no agora buat hotu loos ona.
“Espera katak Juñu ne’e sira bele hetan ona sira-nia direitu. Ita halo verifikasaun ba dokumentu funsionáriu kazuál sira ne’e hahú kedan iha Fevereiru no foin finaliza iha Maiu, tanba kazuál barak maka foin submete dokumentu hanesan kartaun eleitorál no konta bankária. Sira-nia naran barak maka la tuir kartaun eleitorál, entaun presiza hadi’a foun atu labele prejudíka iha prosesu pagamentu”, esplika.
Hipólito salienta katak pagamentu ba kazuál sira ne’e sei diferente, tanba kontratu ne’ebé ministériu halo ho sira ne’e iha durasaun tempu lahanesan, tanba balun hahú husi Janeiru no seluk iha Marsu. “Maibé, pagamentu sei selu dala-ida iha fulan ida ne’e”, nia garante.
Funsionáriu kazuál Diresaun Floresta, Calisto Conceição, haktuir katak nia serbisu iha diresaun iha 2022 nu’udar gudarda florestál ho grau F no kontratu termina iha 2023. Iha 2024, nia hetan rekontratu iha 27 Marsu tinan ne’e.
Kontratu ne’ebé nia asina ne’e hahú husi Janeiru no lasimu ona saláriu fulan neen, maibé nia kontinua serbisu tanba kestaun saláriu la sai obstákulu atu impede nia atividade. “Ida ne’e sai hanesan esperiénsia ida atu kontinua responsabilidade hodi serbí Estadu no rai ida ne’e”, nia dehan.
Nia fiar katakfulan neen sein saláriu nu’udar faze tranzisaun ne’e sei loke oportunidade di’ak liután hodi hatudu vontade serbisu ho leál ba instituisaun atu proteje área sira ne’ebé Governu konsidera ona hanesan fatin protejidu.
Notísia relevante: MAPPF avalia serbisu funsionáriu kazuál 680
Jornalista: Tomé Amado
Editora: Maria Auxiliadora
