DILI, 14 Juñu 2024 (TATOLI) – Servisu Guarda Florestál, munisípiu Dili, kaptura abitante ida husi aldeia 01 de Setembro, iha suku Vila Verde, postu administrativu Vera Cruz, tanba tesi ai-bubur ho ilegalmente iha foho-lolon.
Xefe Departamentu Guarda Florestál, Apolinário Freitas, relata katak durante ne’e sira halo hela observasaun ba área foho-lolon, tanba simu informasaun katak iha ema balun maka hala’o atividade ilegál hodi tesi ai-bubur, maibé bainhira ekipa floresta sira bá halo kontrolu, ema sira ne’e halai tiha.
“Ohin dadeer ami simu fali informasaun husi ita-nia komunidade ida katak ema tesi ai ilegál ne’e agora hala’o hela sira-nia atividade. Ami sa’e bá ho segredu tebes no konsege kaptura duni komunidade ida ho naran Francisco Xavier ne’ebé tesi hela ai-bubur”, Apolinário Freitas informa ba Tatoli iha Colmera, ohin.
Abitante ne’e guarda florestál sira lori bá edifísiu Diresaun Floresta hodi husu nia deklarasaun kona-ba atividade ne’ebé nia halo ho ilegalmente, nomós solisita ba nia atu iha futuru labele halo tan asaun ne’e. Tanba atu ne’ebé nia halo ne’e fó impaktu boot ba natureza no hamosu problema dezastre naturál iha área referida bainhira udan monu rai.
Dirijente ne’e salienta katak laiha ema ida maka bandu komunidade sira tesi ai, maibé atividade ne’ebé sira halo ne’e tenke iha maneira ida ne’ebé di’ak atu labele estraga fali ai-horis sira.
“Ai-bubur ne’ebé komunidade tesi ne’e, ai ida kapa’as tebes. Ai ne’e nia kabuar husi diámetru entre séntimu 15 no 20 maka tesi hotu kedan. Signifika nia oho hotu ita-nia ai-horis sira ne’e”, dirijente ne’e esplika.
Ba abitante ne’ebé tesi ai-bubur ne’e, diresaun husu nia atu prepara kondisaun hodi kuda fali ai-oan hodi troka fali ai sira ne’ebé nia tesi ona. Tanba ne’e, Diresaun Floresta sei apoia fini ai-kakeu hun 100 atu nia kuda fali iha tempu udan.
Iha parte seluk, Francisco Xavier ne’ebé tesi ai ilegál ne’e admite nia hahalok ne’e sala no la kontribui ba kuidadu natureza, maibé buat ne’ebé nia halo ne’e tanba nesesidade família nian. Tanba husi atividade fa’an ai ne’e maka bele sustenta família, liuliu selu oan sira-nia eskola.
Nia mós promete katak sei lahalo tan atividade ilegál ne’e no sei kontribui ba kuda ai oan foun ne’ebé Diresaun Floresta sei fó, nune’e bele fó matak filafali ba área ne’ebé nia tesi ai.
Nia salienta katak sei buka atividade seluk hodi bele ajuda nesesidade família nian, tanba husi atividade ne’e rasik hetan ona notifikasaun, entaun nia deside sei la komete tan atu ilegál ne’e hodi la tama tan iha risku ne’e atu prejudika nia moris no futuru família nia.
Notísia relevante: Floresta halo apreensaun ba ai-sunu
Jornalista: Tomé Amado
Editora: Maria Auxiliadora
