iklan

EKONOMIA, HEADLINE

Floresta halo apreensaun ba ai-sunu

Floresta halo apreensaun ba ai-sunu

Ai-sunu ne'ebé MAP Baucau liuhosi Diresaun Floresta halo apreensaun iha área estrada Vemase. Imajen espesiál.

DILI, 03 Maiu 2024 (TATOLI) – Atividade tesi ai ilegál kontinua akontese iha munisípiu Aileu, Liquiçá, Manatuto no Dili, maske Servisu Guarda Florestál alerta ona ba populasaun sira atu labele ona tesi ai hodi proteje rai bainhira iha tempu udan.

Maibé komunidade balun nafatin kontra, liuliu tesi ai atu uza ba ai-sunu hodi fa’an. Tanba ne’e, guarda florestál sira iha munisípiu sira ne’e hetan hodi halo ona apreensaun ba ai-sunu futun 42 iha Abríl ne’e.

Ai-sunu ne’ebé Servisu Guarda Florestál sira apreende (foti) ne’e husi Liquiçá iha futun 10, Aileu 15, Manatuto 15 no Dili  rua.

Diretór Nasionál Floresta, Guilhermino Moniz, hateten katak ai-sunu sira ne’e guarda sira lori ona bá iha armazein iha Colmera-Dili hodi asegura iha ne’ebá molok tama ba prosesu leilaun, nune’e bele hatama fali reseita ba Estadu, maibé buat hotu sei la’o tuir prosedimentu ne’ebé iha, signifika prosesu leilaun ne’e sei loke ba públiku, maibé la lori fali bá fa’an.

“Ita kontinua fó nafatin orientasaun ba korpu guarda florestál sira atu halo sira-nia serbisu ho responsabilidade, nune’e bele redús atividade ilegál sira ne’e. Rezultadu mak ita-nia guarda sira konsege trava ona ai-sunu lubuk ida maka komunidade sira tesi hodi lori bá fa’an”, Guilhermino Moniz dehan iha Colmera, ohin.

Tuir diretór, populasaun sira ne’ebé konsidera sei fa’an hela ai-sunu ho ilegalmente ne’e parte Floresta  identifika ona família hitu. Husi Liquiçá iha tolu, Manatuto ida, Aileu ida, Dili ida no Metinaru ida.

“Husi prosesu apreensaun ne’ebé guarda florestál sira halo ba komunidade sira ne’ebé fa’an ai ilegál ne’e, iha uma-kain tolu maka uza karreta hodi tula ai-sunu mai fa’an iha Dili, maibé guarda apreende iha parte Tíbar, karreta ida ho ai-sunu futun lima, no parte Beduku karreta rua ho ai-sunu hamutuk futun 10. Ai-sunu sira seluk guarda foti iha dalan ninin bainhira sira fa’an hela”, nia relata.

Notísia relevante: Guarda florestál apreende motosserra neen tanba uza ba tesi ai ho ilegál

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!