DILI, 27 Abríl 2024 (TATOLI) – Korpu guarda florestál iha Ermera no Liquiçá halo apreensaun ba motosserra neen ne’ebé pesoál sira uza ba hala’o atividade tesi ai Samtuku sein karta lisensa.
Diretór Nasionál Floresta, Guilhermino Moniz, dehan motosserra unidade neen ne’e daudaun asegura ona iha iha armazein Floresta iha Colmera, Dili, hodi hein desizaun husi superiór sira.
“Guarda florestál sira apreende motosserra unidade haat iha Ermera no rua iha Liquiçá. Asaun ida ne’e parte autoridade Floresta halo iha Abríl 2024 hodi redús atividade ilegál sira atu komunidade labele kontinua tesi ai tuir sira-nia hakarak”, Guilhermino Moniz hateten iha Comoro, ohin.
Ba atividade tesi ai ilegál sira, diretór ne’e afirma bainhira Governu la halo asaun hodi hapara maka ai-hun boot sira ne’ebé moris hodi asegura rai sira iha foho-lolon sei lakon hotu no ikus mai sei hamosu dezastre naturál.
Nia relembra katak dezde 2011, Governu bandu ona komunidade sira labele tesi tan ai sira sein iha lisensa, liuliu ai protejida sira hanesan Kameli. Proibisaun ne’e Governu fó sai bazeia ba diploma ministerial númeru 16/2012.
“Ita-nia sidadaun sira sei nafatin tesi ai ho ilegál. Ita mós halo nafatin intervensaun liuhusi atividade patrullamentu hodi kontrola sidadaun sira atu labele tesi ai”, realsa.
Antes ne’e, guarda florestál sira husi munisípiu Lautém, Bobonaro, Viqueque, Manatuto no Manufahi halo mós apreensaun ba kilat manu 22 husi grupu kasadór sira ne’ebé halo atividade laiha autorizasaun.
Kilat manu 22 ne’e, iha Lautém apreende 16, Bobonaro rua, Viqueque ida, Manatuto rua no Manufahi ida. Kilat sira ne’e guarda florestál tau hamutuk iha armazein Floresta hodi hein prosesu atu halo destruisaun.
Noísia relevante: Guarda florestál halo apreensaun ba kilat manu 22
Jornalista: Tomé Amado
Editora: Maria Auxiliadora
