DILI, 14 juñu 2024 (TATOLI)—Diretór Nasionál Infraestrutura no Komunikasaun (DNIK) husi Ministériu Transporte no komunikasaun (MTK), Ambrosio Amaral, hateten, prezensa infraestrutura kabu submarinu fibra ótika sei fó vantajen boot ba dezenvolvimentu komunikasaun.
“Vantajen husi kabu submarinu ba dezenvolvimentu komunikasaun iha Timor-Leste ne’e buat barak, vantajen mak sei responde ba preokupasaun públiku kona-na liña internet ne’ebé durante ne’e lentu no seluk mak ita hakarak sistema dijitalizasaun sira bele la’o di’ak tanba ita-nia fontes internet ne’e la’o di’ak ona,” Diretór informa ba Agência Tatoli, iha Farol, sesta ne’e.
Diretór rekoñese katak durante ne’e ema barak mak preokupa ho liña internet tanba desde tinan 2002 kapasidade iha de’it mak 512kbps, daudaun kapasidade to’o ona 1Gb ka 1000mbps, ne’ebé distribui ba instituisaun Governu nian.
“Maibé ho projetu kabu submarinu agora, kapasidade liña internet bele aumenta sa’e ba 800Gb iha faze dahuluk to’o 27Tb,” nia akresenta.
Projetu Nasionál Konetividade (PNK) I hahú husi tinan 2008, PNK II iha tinan 2011, PNK III iha tinan 2023, PNK IV iha tinan 2014, PNK V tinan 2015, PNK VI iha tinan 2016, no PNK VII iha tinan 2022, ne’ebé daudaun Governu liuhusi DNIK halo hela prepasaun ba implentasaun PNK VIII nian.
“Ba PNK VIII nian ne’e ita sei fasilita konetividade internet ba instituisaun Governu nian ne’ebé seidauk iha no sei liga mós ba sentru saúde sira no sede suku sira hodi garante programa sistema dijitalizasaun husi Governu,” nia relata.
Notísia relevante : Empreza entrega ona obra CLS kabu fibra ótika iha Bebonuk ba Governu
Konetividade internet iha rai-laran uza de’it sistema microwave husi operadór telekomunikasaun sira hanesan Timor Telecom ho kapasidade 4Gb, Telemor 7,5Gb, Telkomcel 13,5 Gb, nune’e Internet Service Provider (ISP) hanesan Metro Link no SACOM TL sira ne’e hotu tau hamutuk 30Gb.
Kona-ba konetividade liña internet ne’ebé dala barak monu tanba sistema microwave rasik iha limitasaun distánsia liña no klima, liu-liu tempu udan.
Maski daudaun operadór Telemor mak sai superior kobertura ba konetividade tanba instala ona tower Base Transceiver Station (BTS) hamutuk 300 iha territóriu laran.
Folin internet iha Timor-Leste rasik sei karun no rendimentu operadór telekomunikasaun sira tun kompara konstrusaun tower BTS ida ho valór $50.000 to’o $100.000.
Aliende ne’e, la fasil hili fatin harii tower BTS. Vantajen seluk husi kabu ne’e mak ba sósiu ekonómiku nian liga ba investimentu sira.
“Bainhira ita-nia liña internet di’ak ona mak sei atrai mós ba kompañ boot mai husi rai-li’ur halo investimenu iha ita-nia rai tanba bainhira investidór sira hakarak investe ne’e tau prioridade ida mak liña internet,” nia dehan.
Jornalista : Arminda Fonseca
Editora : Julia Chatarina
