DILI, 14 juñu 2024 (TATOLI)–Estadu Unidu Amérika liuhosi Ajensia Estadu Unidu ba Dezenvolvimentu Internasionál (USAID, iha inglés) ensera projetu kooperasaun ho Ministériu Saúde no Organizasaun Naun Governamentál kona-ba atividade sustentabilidade sistema saúde iha Timor-Leste ne’ebé hahú hosi tinan 2021.
Enkaregadu Negósiu Estadu Unidu Amérika iha Timor-Leste, Mark Weinstock, hateten projetu envolve entre Ministériu Saúde no sosiedade sivil hodi reforsa sistema saúde iha Timor-Leste ne’e, ho fundu husi Governu no povu amerikanu ho montante osan hamutuk millaun $17 ne’ebé implementa durante tinan tolu iha Timor-Leste.
“Atividade susesu hosi Sistema Saúde USAID nian hetal liuhosi kolaborasaun besik ho Ministériu Saúde, parseiru dezenvolvimentu, Fórum Organizasaun Naun Governamentl Timor-Leste (FINGTIL), Organizasaun Sosiedade Sivil, lider komunitária no membru komunidade,” Enkaregadu Negósiu Estadu Unidu Amérika iha Timor-Leste, Mark Weinstock, iha nia diskursu, iha atividade enseramentu projetu Atividade sustentabilidade saúde hosi USAID, iha Hotel Timor.
Iha Fatin hanesan, Diretór Ezekutivu FONGTIL, Valentim Pinto, hateten USAID fó apoiu Tékniku no finanseira ba sosiedade hanesan mós REBAS-TL nu’udar organizasaun dahuluk iha Timor-Leste hodi halibur organizasaun sosiedade sivil hamutuk 43 iha teritóriu ne’ebé lansa iha 2022.
“Parseria entre Ministériu Saúde ho REBAS-TL bele fahe informasaun saúde ne’ebé importante hodi nune’e hasa’e koñesimentu membru REBAS-TL nian. Hasa’e kapasidade REBAS-TL nian liuhosi dezenvolvimentu materiál advokasia konpreensivu inklui manuál fasilitadór sira,” Diretór Ezekutivu FONGTIL, Valentim Pinto, iha nia diskursu.
USAID mós fasilita formasaun online ba membru REBAS-TL kona-ba advokasia ba iha atividade saúde nian iha rai-laran.
“Hodi FONGTL no sosiedade sivil nia naran, hato’o ami-nia agradesimentu boot ba Governu Estadu Unidu Amérika ba apoiu boot tebe-tebes ba Timor-Leste, liuliu atu fó kobit ba sosiedade sivil hodi foti nia papel hanesan povu nia matan no tilun,” nia hateten.
Iha projetu ne’e dezenvolve deskrisaun servisu no manuál avaliasaun desempeñu 40 atu promove jestaun rekursu umanu bazeia ba kompeténsia no méritu, Asosiasaun Médika Timor-Leste hodi estabelese padraun kompeténsia dahuluk nasaun nian no kódigu étika ba médiku sira.
Atividade ne’e habelar monitorizasaun saúde komunitaria liuhosi estabelesimentu asembleia saúde iha suku 19, fasilita diálogu komunitaria no dezenvolve planu asaun lokál ba inisiativa mudansa hahalok sosiál sira.
Iha mós envolvimentu sivika no advokasia hodi apoia kriasaun REDE Saúde Timor-Leste (REBAS-TL) hanesan Rede Saúde Nasionál dahuluk hosi Organizasaun sosiedade Sivil ne’ebé sai parseiru prinsipál ba Ministériu Saúde (MS).
Aselera asesu ba vasinasaun COVID-19, parseria ho Ministériu Saúde (MS) no Hamutuk Nasaun Saudável (HAMNASA) hodi Administra doze vasina liu rihun 80 iha munisipiu sira.
USAID mós servisu hamutuk Oragnizasaun Saint John of God International Health hodi implementa programa dezenvolvimentu lideransa nian ba diretór sira hosi MS no Instiutu Nasionál Saúde Públika.
Jornalista : Jesuína Xavier
Editór : Cancio Ximenes
