VIQUEQUE, 17 juñu 2024 (TATOLI)-Komunidade Musulmanu Munisípiu Viqueque, segunda ne’e, selebra loron Idul Adha 1445 H iha Mesjid, suku Matahoi, postu Uatulari hodi haklaken fiar no promove fraternidade umana.
Iha selebrasaun loron Idul Adha ne’e lidér musulmanu Munisípiu Viqueque, Venancio Oliveira, esplika komunidade musulmanu Viquequeu konsentra hamutuk iha Mesjid Uatulari hodi selebra Idul Adha hodi hanoin hikas profeta Abrão ne’ebé uluk Maromak koko ninia fiar, haruka Abrão ko’a nia oan Ismail. Nune’e Abrão halo tuir saida maka Maromak nia hakarak halo tuir duni, Maibé Maromak fó fali Bibi ida maka ko’a hodi troka Abrão nia oan Ismail.
“Tanba ne’e kada tinan-tinan musulmanu iha mundu tomak inklui komunidade musulmanu iha Timor Leste selebra loron Idul Adha. Selebrasaun Idul Adha ne’e sai hanesan ezemplu ida ba ami katak ita tenke fiar ba Maromak tanba Maromak hun ba buat hotu”, Venancio Oliveira, hateten ba jornalista sira, iha Mesjid muslumanu, iha postu Uatulari, ohin.
Selebrasaun ne’e Venancio husu komunidade musulmanu sira iha munisípiu Viqueque atu hametin nafatin fiar ba Maromak no halo tuir de’it Maromak nian hakarak.
“Fiar ne’e la’ós ita haree makal halo tuir, maibé ida-ne’e mai husi ita-nia fuan rasik. Ne’ebé ita tenke fiar nafatin ba Maromak. Nune’e loron ikus ita bele hetan naroman iha lalehan”, nia hato’o.
Iha fatin hanesan, Komunidade Musulmanu munisípiu Viqueque, Abrão Aparício Tavares, sente kontente partisipa selebrasaun loron Idul Adha 1445 H anba tempu uluk profeta Abrão halo sakrifísiu ba Maromak, nune’e sai hanesan kultura ida iha muslumanu.
“Ami sente kontente tinan ida-ne’e ami bele partisipa hodi halo tuir profeta Abrão nian, selebra hamutuk ho família sira. Ba oin ami nafatin habelar ami-nia relijiaun ida-ne’e hodi fó motivasaun ba ami-nia komunidade musulmanu sira iha Timor Leste”. Nia subiña.
Enkuantu selebrasaun ne’e komunidade musulmanu munisípiu Viqueque konsentra hamutuk iha mesjid Uatulari tuku 7:00 no komunidade sira reza hamutuk. Depois ramata kontinua realiza serimónia oho karau nu’udar simbolu Abrão nian sakrifisiu ne’ebé fiar ba Maromak.
Nune’e mós komunidade musulmanu Viqueque oho karau hamutuk neen no tuir planu na’an karau sira-ne’e sei oferese ba komunidade musulmanu inklui mós komunidade sira seluk hodi hametin fraternidade umanu no kriatura Maromak nian.
Enkuantu, ba selebrasaun Idul Adha ba tinan 2024 ne’e, komunidade muslumanu munisípiu Viqueque ne’ebé partisipa mai husi postu Ossu,Viqueque Vila no Uatulari.
Notísia relevante:Musulmanu Timor-Leste selebra Idul Adha 1445 H ho asaun karitativa
Jornalista : Vitorino Lopes da Costa
Editór : Florencio Miranda Ximenes
