iklan

EDUKASAUN, HEADLINE

Aplikante 7.468 vaga bolsa kandidatu faze daruak tuir ezame iha 28 juñu

Aplikante 7.468 vaga bolsa kandidatu faze daruak tuir ezame iha 28 juñu

Diretora Nasionál Rekursu Umanu iha ME, Anita Tavares. Imajen/ME

DILI, 18 juñu 2024 (TATOLI)—Aplikante hamutuk 7.468 ba vaga bolsa kandidatu faze daruak sei partisipa teste fazeadamente, hahú loron 28 juñu to’o 18 jullu tinan ne’e.

“Teste bolsa kandidatu ba faze daruak, ne’ebé husi Ministériu Edukasaun (ME) liuhusi rekursu umanu, fahe ekipa ba iha kada munisípiu inklui Rejiaun Administrativa Espesiál Oé-cusse Ambeno (RAEOA) hodi simu aplikante ba bolsu kandidatu profesór hamutuk 7.468, kompostu husi feto 4.508 no mane 2.960,” Diretora Nasionál Rekursu Umanu iha ME, Anita Tavares, informa ba Agência Tatoli iha ninia knaar fatin, Vila Verde, tersa ne’e.

Númeru ne’e inklui ona ho aplikante ne’ebé antes ne’e aplika ona iha faze dahuluk nian. Vaga ne’e loke de’it ba ensinu báziku primeiru no segundu siklu.

“Ida-ne’e dadus iha tiha ona no Iita foti filafali, inklui mós aplikante foun porvolta 2.000-resin. Komesa aban, ami fó sai ona kalendáriu atu ida-idak bele haree nia naran, oras, no loron. Ita halo teste durante loron-15, hahú iha loron 28 juñu to’o 18 jullu, loron-15 ita sei halo teste ne’e ba iha kandidatu sira, ne’ebé kalendáriu ne’e hahú aban ita taka sai ona atu nune’e kandidatu ida-idak prepara-an no teste ne’e hala’o iha edifísiu Komisaun Funsaun Públika sei uza nafatin eletrónika, ida-ne’e ninia referénsia ne’e ida de’it,” nia akresenta.

Notísia relevante : ME loke vaga bolsa kandidatu profesór faze daruak presiza manorin 800

Biban ne’e, Diretora husu ba aplikante sira atu halo preparasaun másimu tanba ME fó sai link materia ezame nian liuhusi pájina ME nian.

“Favór loke no download nune’e bele lee no hatene. Tanba ita fó sai ona iha despaisu ministeriál no husu ba kandidatu sira labele haree de’it ninia naran, maibé loloos ne’e halo preparasaun kedas. Tanba ne’e, diploma ministeriál ne’ebé públika sai iha Jornl Repúblika atu aplikante sira halo preparasaun atu nune’e sira mai teste hetan rezultadu di’ak,” nia tenik.

Rezultadu ezame tenke tuir lei rekrutamentu atinje valór 60, tanba iha lei dehan katak aplikante ida bainhira la atinje ka to’o de’it 59 ne’e la pasa.

Tuir kuadru pesoál ministériu no despaisu ministeriál númeru 19/2024 13 maiu ne’ebé fó sai ona husi ME katak, ensinu báziku primeiru no segundu siklu ne’e presiza profesór hamutuk 800.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!