DILI, 29 maiu 2024 (TATOLI)—Diretora Nasionál Rekursu Umanu, Anita Tavares, hateten Ministériu Edukasaun loke tan vaga bolsa kandidatu profesór ba faze daruak ne’e presiza manorin 800 hodi koloka ba ensinu báziku primeiru no segundu siklu.
Notísia Relevante: Posibilidade ME loke vaga bolsa kandidatu profesór faze daruak iha maiu
“Tuir diploma ministeriál, ita presiza lugares 800, ba eskola ensinu báziku primeiru no segundu siklu de’it. Tanba, tuir identifikasaun kuadru pesoál ministériu no tuir despaisu ministeriál número 19/2024, 13 maiu, nian katak primeiru no segundu siklu ne’e presiza tebes profesór,” Diretora Nasionál Rekursu Umanu ne’e hateten ba jornalista sira iha nia kna’ar fatin, Vila Verde, kuarta ne’e.
Ba oin, nia dehan, sei haree mós ba ensinu báziku terseiru siklu, ensinu sekundáriu jerál no tékniku vokasionál nian maibé daudaun ne’e Ministériu Edukasaun fó prioridade uluk ba primeiru no segundu siklu.
“Ita sei haree uluk ida-ne’e tanba nesesidade, tanba ami koloka la to’o enraun ba faze daruak ne’e ba primeiru no segundu siklu,” nia hateten.
Pontu importante ba aplikante sira mak ba kandidatu sira-ne’ebé la kualifikadu iha prosesu teste bolsa kandidatu faze primeiru iha lugar rekrutamentu edukasaun ensinu báziku, primeiru no segundu siklu ho númeru referénsia BK/02/ME/2024 sei la presiza submete tan dokumentu aplikasaunn foun, maibé Ministériu Edukasaun sei públika naran hodi partisipa iha teste eskritu eletróniku tuir mai.
Ba aplikante anteriór ne’ebé aplika ba lugar rekrutamentu terseiru siklu ho área ensinu hanesan, lingua tetún, portugés, inglés, matemátika, siénsia naturál, siénsia sosiál no dezenvolvimentu pessoal, tenke submete aplikasaun foun bainhira iha interrese atu konkoere iha konkursu bolsa kandidatu faze daruak.
Nia informa ba kandidatu interesadu sira atu haree matéria teste sira ne’ebé públika iha Despaixu Ministerial Nú. 19/2024, 13 maiu, aneksa hamutuk ho avizu ida-ne’e hodi estuda no halo.
Ida-ne’e husu konkorrente atu loke link ka bele mós haree informasaun sira iha website Ministériu Edukasaun www.moe.gov.tl, no facebook https://bit.ly/3UpLx37. Haree hodi preparasaun antes ba teste.
Data aplika vaga referida hahú ohin 29 maiu to’o 13 junu 2024, oras hodi 09h00-15h00.
Iha fatin seluk, Ministra Edukasaun (ME), Dulce de Jesus Soares lansa teste eskritu eletróniku bolsa kandidatu ba profesór segunda faze iha Munisípiu Manatuto.
“Governu iha kompromisu atu promove kualidade ensinu iha Timor-Leste. Nune’e ohin lansa iha Munisípiu Manatuto, ho nia kritériu ne’ebé hanesan faze dahuluk nian mak hatudu kartaun identidade ka eleitorál, diploma legalizadu hosi ensinu superiór, baixarelatu, lisensiatura, maestradu no doutoramentu, ida-ne’e ita-boot sira prense ona no pasa, hodi tuir ezame eletróniku,” Ministra Dulce hateten hafoin fó pose ba profesór ingresu espesiál iha Manatuto, tersa ne’e.
Governante ne’e haktuir tan, signifika ba konkorente sira iha territóriu tomak hodi hakbesik aan ba Ministériu Edukasaun iha Dili, Institutu Nasionál Formasaun Dosente no Professionál Edukasaun (INFORDEPE). Maibé ME mós loke vaga ne’e iha edukasaun munisipál.
“Maibé ba sira-ne’ebé mak foin daudaun tuir teste mak la pasa, sira-nia dokumentu sei rai iha ne’ebá, simplesmente konfirma sira-nia disponibilidade liuhosi pájina Ministériu Edukasaun nian. Ho Komisaun Funsaun Públika no Ministériu Edukasaun husu ba sidadaun hotu-hotu ne’ebé ho fuan ho laran hodi kontribui no hasa’e kualidade edukasaun iha Timor-Leste. Ita-boot nia prezensa no partisipasaun mak sei ajuda tebes hodi hasa’e kualidade,” bia hateten.
Nia hateten, tanba iha fatór barak mak hasa’e kualidade edukasaun maibé fatór importante ida mak profesór sira.
“Tanba, ida-ne’e ita presiza profesór sira-ne’ebé ho kualidade no tempu ona joven sira-ne’ebé grarua iha universidade, mai hamutuk hodi kompete. No vaga ne’e loke durante loron sanulu, hahú kuarta (28 maiu 2024) aban, hakbesik ba Ministériu Edukasaun,” nia dehan.
Notísia Relevante: KM autoriza loke teste bolsa kandidatu faze daruak
Jornalista : Osória Marques
Editór : Cancio Ximenes
