Deputadu PLP husu Governu hadi’a irrigasaun iha Saré-Ermera

DILI, 18 juñu 2024 (TATOLI)- Deputadu PLP, Adolfo Martins, husu Governu liuhosi Ministériu Agrikultura, Peska, Pekuáriu no Floresta (MAPPF) atu tau atensaun hodi hadi’a irrigasaun iha suku Saré, postu administrativu Hatulia A, munisípiu Ermera.
“Iha postu Hatulia A, suku Saré ne’e ponténsia ba natar, maibé to’o agora komunidade ne’ebé iha ne’eba, to’o agora sira agora uza hela irrigasaun manuál. Dezde tempu Indonézia to’o agora, ita restaura ita-nia indepedénsia tinan 20-resin ona, maibé suku Saré seidauk hetan irrigasaun ida moderna atu bele fasilita sira atu bele hasa’e produsaun hare,” nia levanta liuhosi reuniaun plenária iha Parlamentu Nasionál, tersa ne’e.
Tanba ne’e, nia dehan, populasaun sira hato’o ba nia nu’udar reprezentante povu hodi tatoli iha uma fukun Parlamentu Nasionál atu husu Governu liuhusi Ministériu Agrikultura Peska, Pekuáriu no Floresta (MAPPF) oinsá mak tau atensaun.
“Tanba irrigasaun ne’ebé komunidade uza halo natar ne’e, sira serbisu hamutuk hodi tau osan hamutuk hadi’a ho manuál, ho nia distánsia kilométru haat. Tanba ne’e, sira husu se Governu iha hanoin liuhusi Ministériu Agrikultura nia programa rasik katak atu hasa’e produsaun hare iha ita-nia rai ida-ne’e, entaun sira husu oinsá ministériu bele tau atensaun,” nia dehan.
Deputadu CNRT, Francisco da Costa ‘Ikulai’, apresia ho Governu Konstitusionál da-sia (IX) ne’ebé fó prioridade atu halo konstrusaun foun ba irrigasaun sira no mós atu halo manutensaun ba irrigasaun ezistente ne’ebé iha territóriu, ho objetivu atu aumenta liután produsaun hare iha rai-laran.
Vise Ministru ba asuntu Parlamentár, Adérito Hugo da Costa, hato’o katak Governu Konstitusionál da-sia (IX) durante mandatu fó prioridade makaas hodi konstrui irrigasaun foun no halo manutensaun ba irrigasaun ne’ebé iha territóriu hodi bele hasa’e produsaun hare iha rai-laran.
Tanba ne’e, agora kona-ba infraestrutura irrigasaun ninian ba konstrusaun foun no manutensaun balun prosesu la’o hela no balun lansa ona, kona-ba irrigasaun iha suku Saré nian rejista hela sei hato’o ba MAPPF hodi bele fó resposta detallu.
Notísia Relevante: https://tatoli.tl/2024/03/07/mappf-prevee-millaun-5-resin-konstrui-irrigasaun-iha-baucau-bobonaro-viqueque/
Jornalista : Nelson de Sousa
Editór : Cancio Ximenes

