iklan

DESPORTU, HEADLINE

‘Dere’ Hera United 4-1, UEP FC semo kedan ba oitavu finál

‘Dere’ Hera United 4-1, UEP FC semo kedan ba oitavu finál

DILI, 18 juñu 2024 (TATOLI) – Ekipa UEP FC susesau semo ona ba oitavu finál kopa Maun Boot Kay Rala Xanana Gusmão bainhira ‘dere’ nia adversáriu Hera United ho rezultadu 4-1.Jogu ba ekipa rua realiza iha Estádiu Munisipál Dili, tersa loraik ne’e.

Bainhira jogu la’o ekipa rua lansa kedan kontra no atake ba malu tuir tékniku no abilidade ekipa idaidak nian oinsa atu hatama golu.

UEP hatudu kedan nia forsa oinsa lansa atake ne’ebé másimu ba Hera halo Hera book-aan la di’ak. UEP iha ambisaun hakarak manán jogu ne’e, maioria jogadór UEP hametin tebes unidade iha kampo laran.

Ho unidade ne’ebé iha hatudu duni rezultadu di’ak tanba iha minutu 15 jogadór Silveiro Garcia (10) lansa ona golu primeiru muda rezultadu ba 1-0. Golu ne’e hanesan presaun hasoru Hera.

Maske nune’e Hera mantein ho ritmu jogu ne’ebé iha hodi responde atake ne’ebé lansa husi UEP. Makse esforsu hotu Hera halo maibé sempre falla iha lina finalidade ikus labele prodús golu.

UEP kontinua hala’o jogu ho tipu ofensivu ka jogu nakloke, ikus iha minutu 27 jogadór Agustinho da Silva (2) lansa tan golu ida muda rezultadu ba 2-0.

Hera kontinua joga ho kalma, lansa defensivu halo mós ofensivu maibé nafatin falla. Iha minutu 42 jogadór UEP tenta halo falta hasoru jogadór Hera ikus árbitru fó kedan penalidade nune’e Hera bele lansa sutu livre.

Penalidade ne’e ezekuta husi jogadór Florindo Magno (19). Sutu ne’ebé Florindo halo hatudu duni rezultadu pozitivu tanba bola tama liu ba rede laran UEP nian muda kedan rezultadu ba 1-2.

Golu ne’e hanesan golu ikus ba ekipa rua iha jogu primeira parte nian tanba to’o minutu jogu termina laiha tan golu ruma husi ekipa rua no rezultadu hela provijoriu 2-1.

Hakur ba segunda parte ekipa rua kontinua lansa kontra no atake ba malu ho ritmu ne’ebé aas. Hera buka meiu hotu oinsa halo empata jogu ne’e, maibé UEP la fó fatin ikus Hera labele halo buat ida iha jogu ne’e.

Minutu kontinua la’o ho nonok, jogu la’o ho barullu, UEP tenke servisu maka’as oinsa mantein ho rezultadu ne’ebé iha no iha posibilidade bele hatama tan golu.

Kontra no atake sai manas liutan, UEP hatudu nia forsa ne’ebé extraordinariu nune’e ikus iha minutu 67 jogadór José Pereira (5) aumenta tan golu ida muda rezultadu ba 3-1 hodi lori rezultadu semo dook ona husi Hera.

Hera nafatin esforsu maibé esforsu hotu hela de’it hanesan esforsu tanba nunka hatama golu hodi muda rezultadu. UEP nafatin esforsu oinsa aumenta golu, teki-teki iha minutu 83 jogadór Juvencio Casmiro (9) lansa tan golu ikus hodi hametin rezultadu ba 4-1.

Husi vitoria ne’ebé UEP hetan lori kedan ekipa ne’e semo ona ba oitavu finál. Enkuantu Hera United obrigadu tenke sai ona husi jogu ne’e hodi hein fali oportunidade jogu iha tinan oin.

Notísia relevante:Buradu FC dudu sai Kampung Alor husi kopa Xanana

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!