iklan

DESPORTU, HEADLINE

Buradu FC dudu sai Kampung Alor husi kopa Xanana

Buradu FC dudu sai Kampung Alor husi kopa Xanana

DILI, 12 juñu 2024 (TATOLI) – Ekipa istimadu husi Munisípiu Lautém Buradu FC susesu iha nia jornada 16 finál hodi dudu-sai Kampung Alor FC ho golu mihis 1-0 , nune’e ekipa ne’e ultrapasa kedan ba oitavu finál kopa Maun Boot Kay Rala Xanana Gusmão.

Jogu ba ekipa rua realiza iha Estádiu Munisipál Dili ne’ebé animu tebes husi adeptus sira hakilar ho lian maka’as fó suporta ba sira nia ekipa favóritu nune’e bele halo golu ho lais nune’e bele hetan vitoria.

Bainhira jogu la’o ekipa rua ho ambisaun ne’ebé maka’as utiliza tékniku no abilidade hotu ne’ebé haraik ona husi treinadór nune’e bele prodús lalais golu.

Buradu utiliza kedan estratejia hotu ho másimu nune’e iha minutu 3 jogadór Lenito dos Santos (17) hetan ona oportunidade hodi lees rede Kampung Alor muda rezultadu ba 1-0.

Golu ne’e halo Kampung Alor tenke servisu maka’as nune’e bele halo empata ba jogu ne’e, maibé estratejia hotu Kampung Alor halo sempre falla iha lina finalidade ikus labele prodús golu.

Buradu lakoi hela de’it ho golu ida ne’e, sira nafatin lansa atake ne’ebé másimu maibé defeza Kampung Alor nian metin tebes ikus lakona iha alvu.

Treinadór Kampung Alor nian la nonok, halai ba mai orienta jogadór sira maibé jogadór sira nafatin falla iha lina klaran no lakon bola barak, bola ne’ebé merese atu halo golu maibé la akontese no oportunidade barak mós guarda rede Buradu salva.

Ekipa rua halo kontra no atake ba malu durante minutu 40 nia laran la rezulta golu, tenke deskansa tia minutu 15 depois kontinua hika’as no vitoria provijoriu hela ba Buradu mak lidera jogu 1-0.

Haka’at ba segunda parte ekipa rua nafatin lansa kontra no atake ne’ebé másimu ba malu. Kampung Alor ho ambisaun ne’ebé maka’as atu halo empata jogu nne’e hodi haka’at ba sutu penalidade.

Maibé esforsu hotu ne’ebé Kampung Alor halo hela de’it hanesan esforsu tanba la rezulta golu ruma. Buradu hatene ona nia mak sei manán nia kontinua hatudu jogu ho defensivu, la preokupa iha lina oin atu aumenta golu, jogu ho kalma hein oras termina bele prega metin vitoria.

Kampung Alor sente la hakmatek, jogadór adeptus halo reasaun oioin, maibé nunka hatudu iha prova, sempre falla iha finalidade ikus to’o minutu normál termina vitoria prega metin ba Buradu hodi hetan oportunidade haka’at ba oitavu finál no Kampung Alor hela ho derota no fila ho tristeza.

Notísia relevante:Buradu FC derrota kontra Zhavia FC 0-3

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!