Buradu FC derrota kontra Zhavia FC 0-3
DILI, 03 juñu 2024 (TATOLI)- Ekipa istimadu husi Munisípiu Lautem Buradu FC obrigadu tenke derrota kontra adversáriu Zhavia FC ho eskore 0-3, iha jogu kontinuasaun faze grupu kopa Maun Boot Kay Rala Xanana Gusmão ne’ebé realiza iha Estádiu Munisipál Dili, segunda lokoraik ne’e.
Hanesan baibain jogu la’o ekipa rua lansa kedan kontra no atake ba malu tuir tékniku no abilidade ekipa idaidak nian. Jogadór ekipa rua fintas bola ba mai, halo jogu ofensivu akompaña mós defensivu nune’e haau malu ho seriedade se los mak atu hatama golu.
Zhavia lansa atake ne’ebé másimu tebes kontra Bruradu, Buradu halo auto-defeza maka’as maibé Zhavia nia sorte liu Buradu nune’e iha minutu 36 jogadór Zhavia Jobelquim da Costa (13) lansa ona golu primeiru hodi muda rezultadu ba 1-0.
Golu ne’e halo Buradu servisu maka’as oinsa halo empata jogu ne’e. Maske servisu hotu Buradu halo ikus sempre falla iha finalidade fó impaktu la prodús golu.
Zhavia mós hatudu jogu brillante oinsa aumenta golu maibé oportunidade seidauk to’o tanba Buradu sempre hamate tutuir jogu ne’ebé Zhavia lansa.
Ho atake malu ne’e to’o minutu primeira parte termina ekipa rua la prodús tan golu Zhavia provijoriu lidera jogu ho eskore 1-0.
Dolar ba segunda parte ekipa rua mantein iha pozisaun. Nafatin lansa atake ba malu ho bola kabuar iha kampo laran, Zhavia halo presaun ne’ebé másimu oinsa atu aumenta tan golu.
Ho servisu ne’ebé armada Zhavia halo ikus fó duni rezultadu pozitivu. Iha minutu 46 jogadór Domingos Americo (9) lansa tan golu ida muda kedan rezultadu ba 2-0. Golu ne’e mós obriga Buradu tenke servisu aumenta liutan, maibé servisu hotu Zhavia halo hela de’it hanesan esforsu tanba la rezulta golu.
Avansadu Buradu hetan oportunidade barak iha lina finalidade, maibé sempre hamate tutuir husi defeza Zhavia nian, sutu balu mós salva husi guarda rede Zhavia.
Nune’e jogu la’o to’o minutu 70 jogadór Zhavia Gabriel Pires (21) hetan tan oportunidade fura rede Buradu hodi hametin rezultadu jogu ba 3-0. Golu ne’e hanesan golu ikus hodi termina ekipa rua nia jogu tanba to’o minutu normal jogu remata laiha tan golu ruma mak akontese no vitoria prega metin ba Zhavia.
Vitoria ne’ebé Zhavia rekolla lori ekipa ne’e lidera metin tabela klasifikasaun grupu A ho lontu hitu, Buradu okupa pozisaun segundu ho pontu neen. Ekipa rua ne’e konfirmadu ona hakat ba jogu 16 finál, enkuantu klube rua seluk hanesan Relay FC ho pontu tolu, Pilatos FC ho pontu ida konfirmadu sei la avansa ona ba 16 finál.
Jogu ba ekipa rua lidera husi árbitru prinsipál Fernando da Costa, juiz liña Antonio Carvalho, Paulo da Costa no árbitru rezerva Bernardino Mascarinhas.
Notísia relevante:Kopa Xanana: Hera United FC ‘dere’ Lecidere FC 4-0
Jornalista: Hortencio Sanchez
Editór: Florencio Miranda Ximenes
