iklan

COVALIMA, HEADLINE

Eskola sira iha Covalima simu ona osan konsesaun eskolár

Eskola sira iha Covalima simu ona osan konsesaun eskolár

Xefe Programa Servisu Edukasaun Covalima, Gregório Ferreira Afonso. Foto/Celestina Teles.

COVALIMA, 18 Juñu 2024 (TATOLI) – Ensinu bázika no pré-eskolár sira iha Covalima simu ona osan konsesaun eskolár ba períodu dahuluk nian, entre Janeiru no Juñu 2024.

“Pré-eskolár iha Covalima hamutuk 24, husi númeru ne’e 10 mak nain foti sira-nia konsesaun eskolár iha banku, maibé 14 ha’u ho diretora mak foti hafoin entrega ba sira, tanba eskola seidauk iha konta bankária”, Xefe Programa Servisu Edukasaun Covalima, Gregório Ferreira Afonso, informa iha Santa Rosa, ohin.

Ministériu Edukasaun (ME) atribui konsesaun eskolár ba pré-eskolár bazeia ba dekretu-lei númeru 84, artigu 7 ne’ebé altera husi dekretu-lei númeru 3/2016 kona-ba Estatutu Administrasaun Munisipál no Atribui Konsesaun Eskolár ba Ensinu Báziku tuir dekretu-lei númeru 32/2023, artigu 69, kona-ba Gastu Orsamentu Konsesaun Eskolár Tuir Nesesidade  Eskola.

Governu atribui konsesaun eskolár fahe ba kategória hanesan, konsesaun eskolár ba ensinu pré-eskolár ne’ebé responsabiliza husi munisipál ho nia orsamentu kada estudante $0,75 no konsesaun eskolár ba ensinu báziku reponsabiliza ba Ministériu Edukasaun ho nia orsamentu kada estudante $2.

Tuir dadus, estudante ensinu pré-eskolár públiku iha 2024 hamutuk 1.604, ne’ebé nia orsamentu ba fulan neen ho totál $7.812, husi orsamentu inisiál $15.705, no alunu ensinu báziku hamutuk 14.174 husi eskola 20 ho nia filiál 63 iha direitu ba konsesaun eskolár ho totál $170.088.

Diretór Eskola Bázika Sentrál Foho-Bua, Joaquim dos Santos, dehan osan konsesaun ba eskola  Foho-Bua hamutuk $5.572. “Husi orsamentu ne’e, ami distribui ba eskola bázika filiál Baer, Foho-Lulik, Fatuk-Metan no Tilomar hodi sosa materiál eskolar no seluk tan”, Joaquim dos Santos adianta.

Tuir dadus, alunu iha eskola bázika sentrál Foho-Bua ho nia filiál haat hamutuk 440 ho totál profesór 30.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!