iklan

HEADLINE, INKLUZAUN SOSIÁL

Ministra Verónica asina akordu subvensaun millaun $1,3 ho ISS hamutuk 30

Ministra Verónica asina akordu subvensaun millaun $1,3 ho ISS hamutuk 30

Ministra Solidariedade Sosiál no Inkluzaun, Verónica das Dores, asina akordu subvensaun ho Institutu Solidariedade Sosiál, iha salaun MSSI, Caicoli, tersa (18/06/2024). Imajen Tatoli/António Daciparu

DILI, 18 juñu 2024 (TATOLI)—Ministra Solidaridade Sosiál no Inkluzaun, Verónica das Dores asina kontratu ho Instituisaun Solidaridade Sosiál (ISS) hamutuk 30, iha tersa ne’e, hodi atribui subvensaun $1.309.453,24, ne’ebé subvensaun ne’e hodi utiliza durante tinan-ida nian.

Objetivu atividade ne’e tanba ISS reprezenta Governu liuhusi Ministériu Solidaridade Sosiál no Inkluzaun (MSSI) no hanesan liman-ain atu tau-matan vítima sira hanesan feto faluk, oan kiak, vítima ba violénsia bazeia ba jéneru oin-oin, defisiénsia, no seluk tan iha terrenu.

“Proposta ISS ne’ebé tama hamutuk 32 maibé ohin ita asina kontratu ne’e 30 tanba rua sei iha prosesu avaliasaun nia laran. ISS 30 ne’e ho nia orsamentu hamutuk $1.309.453,24,” Ministra Verónica informa iha salaun MSSI, Caicoli.

Biban ne’e, governante ne’e husu ba benefisiáriu sira atu utiliza osan ho di’ak hodi fó apoiu ba maluk sira ne’ebé presiza, liu-liu oan kiak, faluk, defisiénsia no seluk tan, tanba ISS mak sai mahon.

Notísia relevante : MSSI atribuisaun kartaun NISS ba setór privadu sira

Benefisiáriu subvensaun mai husi Uma-mahon ualu, Orfonatu lima, Sentru Komunitáriu sia, no Área Defisiénsia ualu.

Iha fatin hanesan, Diretora Ezekutiva Fórum Komunikasaun Feto Timor Lorosa’e (FOKUPERS), Domingas Afonso Amaral, agradese tanba tinan ne’e bele hetan subvensaun hodi kontinua programa no atividade sira.

“Tinan ne’e ita hetan orsamentu atu kontinua nafatin presta serbisu ba feto no labarik vítima sira iha Uma-mahon FOKUPERS nian inklui Uma-mahon Maria Tapo, ne’ebé na’in mak Governu, maibé fó FOKUPERS mak jere durante tinan-10 ona, entaun totál orsamentu ne’ebé ita hetan husi MSSI hamutuk $125.000,” nia informa.

Organizasaun Naun Governamentál ne’e sei kontinua sai Uma-mahon ba feto no labarik vítima bazeia ba violénsia jéneru, inklui halo mós psikoterapia ba vítima sira nune’e bele rekupera husi trauma sira.

“Ita mós kontinua fó asisténsia hanesan tratamentu no asesu saúde, akompañamentu prosesu legál, edukasaun formál no naun formál ne’ebé ita halo iha Uma-mahon inklui ita mós halo abilidade moris nian (life skill tranning) ida-ne’e hola parte ida husi prosesu terapia ida-ne’ebé bele ajuda sira hodi rekupera sira-nia traumátiku sira no atividade seluk tan,” Domingas hateten.

FOKUPERS husi janeiru to’o marsu 2024 rejista kazu kona-ba feto no labarik vítima hamutuk 85.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!