iklan

COVALIMA, HEADLINE

Mota haat iha Covalima presiza halo normalizasaun 

Mota haat iha Covalima presiza halo normalizasaun 

Diretór Servisu Munisipál Obra Públika Covalima, Sidónio Gusmão. Imajen/TATOLI, Celestina Teles.

COVALIMA, 18 Juñu 2024 (TATOLI) – Servisu Munisipál Obra Públika (SMOP) Covalima identifika mota haat iha munisípiu ne’e presiza halo normalizasaun, tanba iha tempu fó ameasa ba populasaun sira.

Diretór SMOP, Sidónio Gusmão, dehan mota sira ne’e mak Tafara ne’ebé lokaliza iha postu Tilomar, mota Mola, Lomea no Ochuro eziste iha postu Zumalai.

“Ita presiza atu halo normalizasaun ba mota haat, tanba iha tempu udanmota Tafara fó ameasa ba komunidade hodi hamosu inundasaun, nomós mota sira seluk fó ameasa no estraga hotu komunidade nia hahán”, Sidónio Gusmão dehan.

Ho kestaun ne’e maka Diretór Obra Públika sei aprezenta ba Ministru Obra Públika atu buka buka solusaun hodi halo normalizasaun, nune’e bainhira iha tempu udan labele fó ameasa ba ema.

SMOP Covalima hasoru difikuldade bainhira iha tempu udan labele halo intervensaun lalais, tanba laiha ekipamentu pezadu no orsamentu hodi apoia sira halo atuasaun sedu, maibé presiza submete proposta ba nasionál ka husu ajuda ba empreza sira mak halo normalizasaun.

Aleinde identifika mota sira ne’ebé fó ameasa, SMOP mós identifika estrada ne’ebé liga husi kapitál Suai bá postu Tilomar, Fohorem no Fatumea tanba hotu hodi difikulta movimentu ema no transporte públiku.

Prezidente Autoridade Covalima, Miguel Armada Cardoso, dehan udan foin lalais ne’e mota danifika komunidade nia ai-han no animál sira iha suku Lour, aldeia Salasa no Tilis, aldeia Galitas, Baurua Ikun, iha suku Tashilin, postu Zumalai.

“Mota ne’ebé ha’u temi estraga de’it komunidade nia aihan, tanba ita-nia  ekipa sira tuun hodi halo atendementu”, nia dehan.

Notísia relevante: MSSI-ME apoia nesesidade bázika ba komunidade no estudante afetadu inundasaun iha Covalima

Jornalista:Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!