iklan

HEADLINE, INKLUZAUN SOSIÁL

MSSI aprova benefisiáriu 69.571 ba programa Bolsa da Mãe Kondisionál 2024

MSSI aprova benefisiáriu 69.571 ba programa Bolsa da Mãe Kondisionál 2024

Ministra Solidariedade Sosiál no Inkluzaun, Verónica das Dores kualia ba jornalista sira hafoin lansamentu Bolsa da Mae husi MSSI. seremonia lansamentu nee halao iha salaun MSSI kaikoli dili, tersa 18/6/2024. Imajen Tatoli/Antonio Daciparu

DILI, 18 juñu 2024 (TATOLI)Ministériu Solidaridade Sosiál no Inkluzaun (MSSI), tersa ne’e, halo ona lansamentu ba pagamentu programa Bolsa da Mãe Kondisionál 2024.

Ministra Solidaridade Sosiál no Inkluzaun, Verónica das Dores, informa, programa ne’e  nu’udar programa Governu ne’ebé kontinua implementa hahú husi tinan 2008 bazeia ba dekretu-lei númeru 18/2012 04 abríl.

“Ohin, 18 juñu 2024, MSSI aprova lista benefisia”áriu elejível ba pagamentu faze dahuluk no informa mós kona-ba prosesu hotu relasiona ho pagamento Bolsa da Mãe Kondisionál tinan 2024. Bazeia ba tetu orsamentu 2024 ne’ebé MSSI aloka ba Bolsa da Mãe Kondisionál $6.642.777. Totál benefisiáriu elijível hamutuk  69.571 iha munisípiu hotu iha tinan 2024, ho montante orsamentu $7.066.596,” Ministra informa iha salaun MSSI, Caicoli.

Dekreitu-lei ne’e hetan alterasaun iha janeiru 2024, hodi halo mudansa ba montante orsamentu ba benefisiáriu sira liuhusi dekretu-lei númeru 1/2024 03 janeiru, iha artigu 10 no artigu 11 ne’ebé deskreve mudansa ba montante orsamentu no akresenta liután kondisionalidade eskola ba benefisiariu sira.

Notísia relevante : MSSI sei halo lansamentu pagamentu Bolsa da Mãe Kondisionál iha fulan-juñu

Iha mudansa ne’e montante orsamentu mak Ensinu Primáriu hetan $8.00, Ensinu Pre-Sekundáriu  $9.00, Ensinu Sekundáriu $10.000, no labarik ho defisiénsia sei hetan tan adisionál $5.

Totál benefisiáriu sira mak hanesan ba Ensinu Primiáriu 43.211 ho totál orsamentu $4.148.256, Ensinu Pré-sekundáriu 20.405 ho totál orsamentu $2.203.740, Ensinu Sekundáriu 5.955 ho totál orsamentu $714.600.

Bazeia ba tetu orsamentu ne’ebé MSSI prevee iha tinan 2024, signifika sei presiza tan orsamentu $423.819 hodi kobre hotu benefisiáriu ne’ebe identifika ona.

Ho nunue’e, MSSI sei halo pagamentu faze dahuluk iha tinan 2024, sei hahú iha fulan-jullu  ba benefisiáriu hamutuk 59.813, benefisiáriu hirak ne’e la inklui munisípiu Dili no Viqueque tanba munisípiu rua ne’e sei tama iha pagamentu faze daruak, hafoin jullu 2024.

Kalendáriu no ba prosesu pagamentu sira hotu mak hanesan iha loron 19 to’o 20 juñu 22024, ne’ebé lista benefisiáriu sira sei manda ba Banku Nasionál Komérsiu Timor-Leste (BNCTL, sigla portugés) hodi loke konta bankária foun ba benefisiáriu sira hotu.

Semana ne’e nia-laran BNCTL manda fali mai MSSI dadus bankaria foun husi benefisiáriu hotu ne’ebé loke ona.

Iha loron 21 to’o 24 juñu MSSI sei prodús lista pagamentu bazeia ba konta bankária foun ne’ebé fornese ona.

“Semana oin Diresaun Jerál Protesaun Sosiál no Diresaun Nasionál Asisténsia Sosiál aprezenta lista pagamentu ba Dirasaun Jerál Servisu Koorporativu no Dirasaun Nasionál Finansa MSSI nian hodi halo komitementu Cost Per View (CPV),” Ministru dehan.

Nune’e,  iha loron 25 to’o 28 juñu 2024, Diralesaun Jerál Servisu Koorporativu no Dirasaun Nasionál Finansa MSSI sei prepara no koordena serbisu hotu hodi garante orsamentu ne’ebé transfere no tama ona ba konta BNCTL.

“Iha loron hahú 01 to’o 31 jullu 2024, durante fulan-ida nia-laran halo prosesu pagamentu. Ba família no benefisiáriu sira, iha fulan-jullu ne’e mak naran laiha no seidauk simu bele hato’o reklamasaun mai iha MSSI tanba sei iha prosesu faze segundu ba pagamentu Bolsa da Mãe Kondisionál, sei hahú hafoin jullu 2024,” nia tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!