iklan

EKONOMIA, HEADLINE

Projetu konstrusaun irrigasaun Galata hamosu dezentendimentu

Projetu konstrusaun irrigasaun Galata hamosu dezentendimentu

Ministru Agrikultura, Pekuária, Peska no Floresta (MAPPF), Marcos da Cruz. Imajen Tatoli/Francisco Sony

DILI, 18 Juñu 2024 (TATOLI) – Konstrusaun ba irrigasaun Galata iha aldeia Liabala, suco Uatuhako, iha postu Administrativu Venilale-Baucau, hasoru hela problema tanba iha dezentendimentu entre agrikultór no empreza konstrutora China Civil Engineering Construction Corporation ne’ebé atu halo kanalizasaun bee ba natar sira.

Ministru Agrikultura, Pekuária, Peska no Floresta, Marcos da Cruz, hateten, antes ne’e, nia halo ona observasaun direta ba konstrusaun projetu irrigasaun Galata no rona mós agrikultór no empreza nia problema, nune’e bele buka solusaun hodi rezolve dezentendimentu ne’ebé akontese iha terrenu.

“Husu ba kompañia no komunidade agrikultór sira ne’ebé hela besik irrigasaun Galata ne’e atu ko’alia ba malu hodi bele hetan solusaun atu prosesu kanalizasaun bee ba natar bele kontinua la’o”, ministru dehan iha Comoro, ohin.

Tuir planu no polítika Governu nian ne’ebé Ministériu Agrikultura implementa ne’e atu hasa’e produsaun agríkola iha tinan lima nia laran hodi redús importasaun foos.

Governante ne’e haktuir katak irrigasaun Galata lokaliza iha fronteira entre Baucau no Viqueque. Projetu konstrusaun irrigasaun ne’e, empreza sei halo kanalizasaun ba kanu rua, ida ba natar iha Viqueque no seluk ba natar iha Baucau. “Maibé komunidade agrikultór sira husi Viqueque parte Ossu nian la konkorda. Sira hakarak kanalizasaun kanu rua ne’e tenke halo hamutuk de’it, labele keta-ketak”, ministru relata.

Bazeia ba planta no kadernu enkargu (BoQ, sigla inglés), kanu rua ne’e sei la halai hamutuk, nune’e ho dezentedimentu sira ne’e halo prosesu kanalizasaun ne’e demora to’o ohin loron.

“Ha’u husu ona ba komunidade agrikultór sira atu labele dada naruk tan prosesu ne’e. Tanba konstrusaun ne’e la’ós foin maka inísiu, maibé halo ona to’o klaran, tanba kontratór ne’e atu manán tuir kontratu dezeñu ne’ebé iha. Uluk konsultan mai halo surveiy atu halo kanalizasaun kanu bee ba natar ne’e laiha ema ida mak ko’alia, agora buat hotu la’o to’o ona klaran maka mosu fali dezetedimentu sira hanesan ne’e”, nia lamenta.

Diretór-Jerál Kafé no Planta Industriá, Martinho Laurentino Soares, haktuir katak tuir orientasaun Ministru Agrikultura, sesta agora nia ho ekipa sei hakat bá aldeia Liabala, hodi ko’alia ho komunidade atu rezolve problema ne’ebé sira hasoru, liuliu buka solusaun ba kanu rua ne’e bele halai tuir área idaidak nian.

Irrigasaun Galata ne’e konstrui iha mota laran ne’ebé nia sorin ba Viqueque no sorin seluk ba Baucau. Kanu rua ne’ebé atu dada ba natar iha Baucau ne’e kuaze iha ektare 300 no ba Viqueque Oebobo nian kuaze ektare 25 de’it.

Irrigasaun Galata sei kobre área ektare 600 no sei benefisia uma-kain 750. Verba konstrusaun ba irrigasaun Galata prevee liuhusi Fundu Infraestrutura ho montante millaun $14.

Notísia relevante: Projetu irrigasaum Galata Venilale sei gasta millaun $14

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!