iklan

EDUKASAUN, HEADLINE

Diretór garante MESSK nia ezekusaun sei atinje 50% resin iha trimestre daruak

Diretór garante MESSK nia ezekusaun sei atinje 50% resin iha trimestre daruak

Osan dólar amerikanu. Imajen/Espesiál

DILI, 19 juñu 2024 (TATOLI)—Diretór Jerál Planeamentu no Finansa iha Ministériu Ensinu Superiór, Siénsia no Kultura (MESSK), Hernânio da Costa Soares, garante ministériu nia ezekusaun orsamentu iha trimestre daruak tinan ne’e sei atinje 50% resin.

“Atu dehan fulan ne’e ramata ita atinje ona mais de 50% tanba ami iha osan millaun $9 millaun no orsamentu ba universidade de’it iha millaun $5. Ida-ne’e mak kuandu haree dokumentu di’ak ona, ami transfere, entaun ezekusaun bele sa’e,” Diretór informa ba Agência Tatoli, iha salaun MESSK, Colmera, kuarta ne’e.

MESSK nia ezekusaun iha trimestre dahuluk atinje 11% tanba halo hela preparasaun loke vaga ba públiku.

“Ezekusaun ne’e iha dezafiu, iha dezafiu kuandu ita hahú simu proposta no loke konkursu, ida-ne’e sai dezafiu ba ministériu, nune’e ezekusaun iha trimestre dahuluk sempre pursentu kiik, maibé kuandu tama ona trimestre daruak ne’e ezekusaun hahú sa’e.
Trimestre daruak ami espekta bele to’o 50% tanba ami-nia osan boot iha fundu transferénsia públika ho montante millaun $5 husi totál millaun $9 resin ne’ebé ami iha,” nia akresenta.

Notísia relevante :Parlamentu aprova millaun $9,1 ba MESSK

Parte ministériu daudaun ne’e iha hela preparasaun atu asina akordu ho universidade hamutuk 17.

“Agora ita halo prosesu transferénsia tanba iha loron 28 maiu liubá ita asina akordu. Atu halo transferénsia ami presiza dokumentu no bainihira hatama sásan ba laboratóriu sira tenke hato’o espesífika para ami haree tanba verifika fali dokumentu bainhira loos hotu ona ami hahú transfere,” nia tenik.

Institutu Ensinu Superiór 17 kuaze hatama hotu ona dokumentu espesífika no hein MESSK halo verifikasaun dadus.

“Hein katak fim do mês ida-ne’e ami bele halo transferénsia osan ba sira maibé ita transfere uluk 40% husi totál osan, ne’ebé ami fó ba universidade sira-ne’e hamutuk millaun $4,9. Ita sei transfere iha fulan ne’e,” Diretór Jerál salienta.

Tuir lei sei transfere 40% no bainhira benefisiáriu ezekuta tiha no halo relatóriu ba ministériu mak sei tranfere kompletu.

MESSK prevee $ 9.132.072 iha proposta-lei Orsamentu Jerál Estadu (OJE) 2024 hodi fó prioridade ba programa funsionamentu no dezenvolvimentu instituisionál edukasaun formasaun.

Husi totál orsamentu alokadu fahe ba saláriu no vensimentu $2.373.957, bens no servisu $1.491.115, transferénsia públika millaun $5, kapitál menór $117.000 no kapitál dezenvolvimentu laiha.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!