DILI, 19 juñu 2024 (TATOLI)—Ministériu Transporte no Komunikasaun (MTK) kontrata ona empreza Irmão Sandobe atu halo reabilitasaun ba edifísiu parajen ba pasajeiru iha Portu Dili.
Ministru Transporte no Komunikasaun, Miguel Manetelu Marques, hateten, projetu reabilitasaun edifísiu ne’e tama iha kategoria emerjénsia tanba durante ne’e públiku preokupa bainhira turista mai vizita ho ró kruzeiru mai vizita.
“Prosesu reabilitasaun ne’e la’o kleur tanba orsamentu maihusi Konsellu Administrasaun Fundu Infraestrutura (KAFI) no prosesu la’o iha Komisaun Nasionál Aprovizionamentu (CNA, sigla portugés), maibé tanba ida-ne’e hanesan projetu emerjénsia maka tuir lei MTK mak rekomenda empreza, ho ida-ne’e ami iha konkordánsia ha’u rasik mak asina, ita kontrata empreza Irmão Sandobe mak atu halo reabilitasaun ba edifísiu terminál pasajeiru Portu Dili. Tuir planu hahú ohin lae aban empreza hahú sobu ona uma kakuluk,” Ministru informa ba Agência Tatoli, iha Aeroportu Internasionál Prezidente Nicolau Lobato, kuarta ne’e.
Notísia relevante : Loke ona feira ba produtu nasionál iha Portu Dili
Ministru fó ona orientasaun atu sobu uluk uma kakuluk edifísiu parajen hodi hadi’a no taka filafali, hafoin hahú reabilita edifísiu laran.
Tuir nota ne’ebé Agência Tatoli asesu liuhusi pájina ofisiál MTK nian, relata katak prosedimentu ba konstrusaun edifísiu parajen ba pasajeiru iha Portu Dili aprova husi entidade ajudikante hanesan MTK no sertifika husi Ajénsia Dezenvolvimentu Nasionál (ADN) ho valór $315.575,51.
Tuir observasaun jornalista iha Portu Dili, nota katak ohin tékniku sira husi empreza hahú mobiliza ona ekipamentu ba edifísiu no tuir planu hahú kinta (20/06) sei sobu uma kakuluk.
Daudaun ne’e Portu Dili sai hanesan fatin parajen ba ró kruzeiru, parajen ba ró viajen lokál, fatin atrasaun turístiku no produtu lokál, espozisaun, konsertu no seluk tan.
Jornalista : Arminda Fonseca
Editora : Julia Chatarina
