DILI, 19 juñu 2024 (TATOLI)-Ministru Obras Públika, Samuel Marçal informa, Governu liuhosi desizaun Konsellu Ministru aprova ona projetu 21 ne’ebé mak sei implementa iha tinan ne’e.
“Ita antes ne’e iha projetu 62 mak Ministériu Obras Públika rejista, maibé foin daudaun ne’e Konsellu Ministru deside ona projetu hamutuk-21 mak ita sei implementa iha tinan ida-ne’e,” Samuel Marçal hateten ba Jornalista TATOLI bainhira partisipa iha reuniaun Konsellu Ministru Palásiu Governu, kuarta ne’e.
Nia esplika, husi projetu 21 ne’e hanesan reabiltasaun estrada hanesan área Turiscai ba Maubisse no husi Wedaberec ba Alas ne’ebé Governu lansa ona iha foin daudaun inklui obra estrada iha Munisípiu Ermera, estrada iha Munisípiu Baucau Postu Quelicai iha área Laisoru-Lai liga ba Uatulari Munisípiu Viqueque ne’ebé sei halo lansamentu iha semana oin nune’e mós estrada Laclubar ba to’o Turiscai.
“Projetu 21 ne’e balun ita asina ona kontratu hein ba halo lansamentu de’it no balun ita seidauk asina maibé semana ne’e nia laran ita sei asina hotu para empreza sira ne’ebé Governu fó fiar atu halo obra ne’e sira bele hahú ona servisu,” nia adianta.
Ministru Samuel Marçal, hateten, ba projetu 41 ne’e husi Ministériu Obras Públika (MOP) Ajénsia Nasionál Dezenvolvimentu (ADN) sei halo verifikasaun molok aprezenta fali ba Konsellu Ministru atu halo aprovasaun.
“Projetu 41 ne’e ita sei halo verifikasaun fali tanba projetu 41 antes ne’e seidauk iha verifikasaun husi ADN no mós Ministériu Obras Públika tanba ne’e mak ita tenke haree didi’ak no husu ba empreza nasionál ne’ebé envolve iha laran ha’u husu atu pasiénsia tanba ita-nian Estadu la’ós Estadu ne’ebé riku liu tanba ne’e ita hotu-hotu tenke kolabora para ita labele gasta osan arbiru de’it; osan ne’e povu nian, Estadu nia osan, ita gasta tenke ho kuidadu , ita bele gasta osan, maibé tenke hetan buat ne’ebé kualidade para ita uza ba tempu ne’ebé naruk,”nia afirma.
Tanba ne’e, Ministériu Obras Públika no Ajénsia Nasionál Dezenvolvimentu sei halo verifikasaun foun ba fali fali projetu 41.
“Ita haree to’ok ida ne’ebé mak prioridade liu ita sei konsidera, ita sei haree di’diak halo verifikasaun finál no sei lori ba Konsellu Ministru hodi aprova fali depois mak bele halo kontratu,” nia konklui.
Notísia relevante:Suku lima iha Viqueque hetan projetu eletrifikasaun iha tinan ne’e
Jornalista: Natalino Costa
Editór: Rafael Ximenes de A. Belo
